AKK-ja sërish kërkon sqarime për ngritjen e tatimit në pronë: Qytetarët s’po dinë si të veprojnë
Drejtori ekzekutiv i Asociacionit të Komunave të Kosovës, Sazan Ibrahimi, ka kërkuar sërish sqarime nga Qeveria e Kosovës për faturat në pronë dhe për atë se çka do të vendoset të bëhet në këtë drejtim.
Ibrahimi është shprehur se rritja e tatimit ka habitur qytetarët për mënyrën sesi të veprojnë.
Ai ka theksuar se qytetarët nuk po dinë t’i paguajnë apo jo faturat e tatimit në pronë, apo të pritet ndryshimi i ligjit në pronë.
“Bordi i Asociacionit të Komunave të Kosovës, që i përfaqëson Komunat e Kosovës, ka kërkuar nga kryeministri Kurti dhe ministri Hekuran Murati, që vendimin për rivlerësimin e pronave e cila ka ndikuar në mënyrë të drejtpërdrejt në ngritjen enorme të faturave të tatimit në pronë të pezullohen”.
“Nëse një vendim i tillë merret nga ministri Murati, atëherë faturat që u janë dërguar qytetarëve për vitin 2023 të ngritura në raport me vitin 2022 të mos ndryshohen”, ka thënë Ibrahimi për agjencinë e lajmeve Ekonomia Online.
Sipas tij, vendimi i ministrit të Financave, Hekuran Murati për faljen e 100 eurove është joligjor.
“Kërkojmë që Ministria e Financave të dalë më një sqarim dhe të ju rekomandojë qytetarëve se si duhet të bëhet. Në bazë të informatave që kemi vlerësohet se inkasimi i tatimit në pronë ka rënie drastike sepse po mendojmë që qytetarët nuk po dinë se si të veprojnë”.
“Ata janë duke pritur që të ndryshohet ligji mbi tatimin në pronë, apo çështja e cila është ngritur nga ministri e cila ishte jo ligjore falja nga 100 euro dhe po presim sqarime të mëtutjeshme”.
Pa ndonjë analizë se sa rendohet gjendja ekonomike e qytetarëve, pa konsultime me bizneset dhe pa informim paraprak, çmimi për tatimin në prona është dyfishuar.
Për rritjen prej mbi 60 për qind qytetarët u informuan vetëm në momentin kur paguan obligimet e tatimit në pronë.
Në Kosovë përgjegjëse për rritjen e faturimit në prona janë dy institucione: Komunat dhe Ministria e Financave, Punës dhe Transfereve.
Çuditërisht, asnjëra s’ka pranuar se është autorja e rritjes, veçse kanë akuzuar njëra tjetrën.
Sipas komunave, departamenti i Tatimit në Pronë në Ministrinë e Financave bën rivlerësimin e pronave dhe me këtë rast është rritur vlera e pronave duke u bazuar edhe në çmimet e tregut.
Mirëpo, nga ana tjetër udhëheqësi i këtij dikasteri, Hekuran Murati deklaroi se “shkallët tatimore i caktojnë komunat”, kurse “ministria e ka obligimin ligjor për t’i asistuar në vlerësimin e pronave”.
Lidhur me rritjen e çmimeve të tatimeve në pronë ka pasur reagime të shumta edhe nga ana e opozitës. Të njëjtit janë tallur me Qeverinë.
Rritja e çmimit të tatimit në pronë, vjen në një kohë kur në Kosovë kanë pësuar rritje të çmimeve edhe në produktet esenciale.
Si zgjidhje për ta përballuar këtë krizë ishte parë tërheqja e mjeteve të kursimit pensional, Trust-it, por që nuk u vonua në Kuvend pasi partia në pushtet e kundërshtoi.
Sipas të dhënave të Agjencisë së Statistikave të Kosovës, rritja ka filluar nga muaji prill me 1.2 për qind, duke arritur në 5.7 për qind në muajin tetor.
Rritja më e lartë e çmimeve është vërejtur te buka, drithërat, mishi, qumështi, djathi, vaji, vezët, pemët dhe perimet.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
