Agresioni zvarritës i Serbisë ndaj Malit të Zi mund të kthehet në agresion aktiv, thotë shefi i diplomacisë malazeze

Ministri i Punëve të Jashtme, Ranko Krivokapiç, ka deklaruar se Serbia përmes aktiviteteve parazgjedhore të strukturave politke serbe po përfshihet në zgjedhjet lokale në Malin e Zi dhe sipas tij, kjo gjë mund të kthehet në agresion aktiv.

Duke parë edhe përpjekjet destabilizuese të Rusisë në rajon, e vetmja rrethanë e mirë siç thotë ai, është fakti se Mali i Zi është anëtar i plotë i NATO-s.

“Nëse nuk do të ishte ai element, jam i sigurt se agresioni zvarritës do të bëhej më aktiv se sa është në këtë moment”.

Duke iu referuar formacionit pro-serb dhe pro-rus “Fronti Demokratik”, ai shtoi se ky është tregues i qartë për vullnetin politik në qeverinë malazeze.

“Si pjesë e ndikimit rus në disa subjekte politike dhe financimit të tyre, është e qartë se kush janë ata dhe çfarë janë”, ka shpjeguar Krivokapic, transmeton mediumi malazez ‘Analitika’.

Shefi i diplomacisë malazeze ka thënë se shteti duhet të reagojë duke ndërmarrë veprime ligjore dhe kujton se Kushtetuta e ndalon veprimtarinë e organizimeve politike nga jashtë.

“I kam bërë thirrje prokurorisë që të veprojë për gjetjet dhe të kërkojë informacion nga partnerët tanë të NATO-s, për të ndërmarrë veprime ligjore, sepse ato do të rriten nga ajo që është tani një pjesë zvarritëse, në një pjesë aktive në varësi të vullnetit të atyre që i financojnë”.

S’janë vetëm Kosova dhe Bosnja “pikë të nxehta” në Ballkan, është edhe Mali i Zi, thotë Krivokapiç

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.