AGK mirëpret vendimin e Gjykatës për Klan Kosovën: Vendimi mundëson vazhdimin e operimit të punës së televizionit

Asociacioni i Gazetarëve të Kosovës (AGK), e ka mirëpritur vendimin e Gjykatës Komerciale për ta shtyrë vendimin e Ministrisë së Industrisë, Tregtisë dhe Ndërmarrësisë, rreth pezullimit të certifikatës së këtij biznesi.

Përmes një komunikate për media nga AGK-ja është thënë se ky vendim mundëson vazhdimin e punës së televizionit të Klan Kosovës.

“Vendimi i sotëm mundëson vazhdimin e operimit të punës së televizionit Klan Kosova, përkundër vendimit të qeverisë së Kosovës për ta mbyllur atë”.

“AGK-ja, do të monitorojë nga afër procedurat e tjera në vazhdim, me shpresën që epilogu i shpejtë do të përmbyllë këtë episod të përpjekjes së qeverisë për të minuar lirinë e medies në Kosovë”, thuhet në komunikatën e AGK-së.

Edhe juristja e të drejtës së medias, Flutura Kusari, përmes një shkrimi në rrjetin social ‘Facebook’ e ka vlerësuar këtë vendim si “fitoren e parë” të mediumit Klan Kosova në këtë rast.

“Gjykata sot ka vendosur to bllokojë qeverinë në tentativën e saj që ta mbyllë Klan Kosovën. Vendimi është masë e përkohshme apo masë e sigurisë e cila është në fuqi derisa të vendoset për padinë në tërësi”.

Ajo tutje ka sqaruar argumentet që e kanë shtyrë gjykatën që të shtyjë ekzekutimin e vendimit të MINT.

“Vendimi e lë pa regjistrim juridik Klan Kosova dhe rrjedhimisht nuk mund të ushtrojë veprimtari ekonomike”.

“Vendimi do të rezultonte në marrjen e licencës nga ana e KPM-së. Do të ndërprehej marrëdhënia e punës e 220 punëtorëve”.

Sipas saj, përmes këtij vendimi është vërtetuar edhe se tentativa e Qeverisë së Kosovës për ta mbyllur këtë medium është e kundërligjshme.

“Vendimi i sotëm gjyqësor – ndonëse i përkohshëm – është indikator shumë i fuqishëm që tenativa e qeverisë për të mbyllur Klan Kosova është e kundërligjshme, arbitrare, joproporcionale dhe me rrezik të madh për pluralizimin e mediave”.

Gjykata Komerciale, departamenti administrativ e ka aprovuar ankesën e Klan Kosovës, duke e shtyrë vendimin e MINT-it rreth pezullimit të certifikatës së këtij biznesi.

“Mbyllja e Klan Kosovës”, Gjykata e ka shtyrë vendimin

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.