Rreth 5 mijë qytetarë serbë të Kosovës kanë konvertuar patentë shoferët e tyre nga ata ilegal në legal RKS.
Zëvendësdrejtori i Policisë së Kosovës për rajonin e Veriut, Veton Elshani, ka thënë se deri më 2 gusht janë konvenuar 4 mijë e 836 patentë shoferë.
“Në Leposaviq janë konvertuar 1435 patentë shoferë, në Mitrovicën Veriore 1208, në Zubin Potok 758, në Zveçan 880, në Graçanicë 177, në Kamenicë 69, në Shtërpcë 53 etj”, ka theksuar ai për televizionin publik.
Ndryshe, më 27 korrik, Kryeministri i Kosovës, Albin Kurti, në prag të përfundimit të afatit, u ka bërë thirrje pjesëtarëve të komunitetit serb t’i përgjigjen në mënyrë pozitive ftesës së autoriteteve për kalimin nga patentë shoferët e lëshuar nga institucionet ilegale të Serbisë në Kosovë, në patentë shoferë legalë të lëshuara nga institucionet e Kosovës.
“3941 bashkëqytetarë nga komuniteti serb, në të gjitha komunat e Republikës së Kosovës kanë aplikuar deri më sot për konvertim të patentë shoferëve nga ato të strukturave ilegale të Serbisë në patentë shofer të Republikës së Kosovës. Deri në përmbylljen e afatit, kanë mbetur edhe dy javë”, shkroi Kurti në Facebook.
Ai potencoi se nga 9 maji kur ka filluar ky proces, nuk është shënuar asnjë incident i vetëm, derisa i ftoi të gjithë ata që nuk kanë aplikuar ende për konvertim të patentë shoferit që ta shfrytëzojnë këtë mundësi e cila ofrohet në të gjitha komunat deri më datë 9 gusht.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
