Adnan Dibrani, eurodeputeti i parë shqiptar në Parlamentin Evropian

Adnan Dibrani, është shqiptari i parë nga Kosova që ka fituar mandatin e eurodeputetit në Parlamentin Evropian.

Lajmin e ka bërë të ditur shefi i grupit parlamentar nga Aleanca për Ardhmërinë e Kosovës (AAK), Besnik Tahiri, përmes një shkrimi në rrjetin social ‘X’.

“Rezultatet preliminare dhe raportimet e mediave suedeze po tregojnë se, z. Adnan Dibrani, është shqiptari i parë nga Kosova që ka fituar mandatin e eurodeputetit dhe nga sot, në 5 vitet e ardhshme do të jetë eurodeputet në Parlamentin e Evropës”, ka shkruar ai.

Preliminary results in 🇸🇪 show that @adnandibrani won a seat & is becoming the first 🇽🇰 albanian elected in @EUparliament.

Adnan, is from Mitrovica, he immigrated in 90s to 🇸🇪 where he had a great commitment as an active citizen.

He was MP in 🇸🇪 and also a member of @PACE_News. pic.twitter.com/bpw9P7QOPv

— Besnik Tahiri (@besnik_tahiri) June 10, 2024

Tahiri, tha se Dibrani ka lindur në Mitrovicë dhe si i ri kishte emigruar në Suedi.

“Përndryshe, Adnani për tri mandate ishte deputet në Parlamentin e Suedisë dhe po ashtu ishte përfaqësues në Asamblenë Parlamentare të Këshillit të Evropës ku e ndihmoi shumë”, ka shtuar ai.

Zgjedhjet për Parlamentin Evropian u mbajtën nga data 6 deri më 9 qershor në të 27 vendet e Bashkimit Evropian.

Rezultatet preliminare tregojnë se partitë e qendrës, liberale dhe socialiste do të ruajnë shumicën në Parlamentin Evropian.

Mirëpo, fitorja e së djathtës ekstreme u dha goditje të brendshme udhëheqësve të disa vendeve, përfshirë Francën dhe Gjermaninë.

Presidenti i Francës, Emmanuel Macron, shpalli zgjedhjet e parakohshme kombëtare, pasi partia e tij u mposht bindshëm nga rivalja e ekstremit të djathtë.

Macron shpërndau Parlamentin dhe shpalli datën e votimeve më 30 qershor.

“Kam vendosur t’ju mundësoj me votë zgjedhjen e së ardhmes sonë parlamentare”, tha ai.

Partia Fronti Kombëtar – e udhëhequr nga rivalët e Macronit, Marine Le Pen dhe Jordan Bardella – shënoi një nga sukseset më të mëdha në mesin e partive të ekstremit të djathtë në Evropë.]

Rezultatet preliminare treguan se ajo siguroi mbi 30 për qind vota më shumë se Rilindja e qendrës e Macronit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.