Abissnet Superiore/ Teuta dhe Laçi marrin fitore në udhëtim

Superliga e futbollit të Shqipërisë është rikthyer pas rreth një muaji, teksa ditën e dielë janë luajtur dy ndeshjet e para të javës së 13-të.

Teuta ka shënuar fitore të rëndësishme në udhëtim te Kukësi me rezultat minimal 0:1, teksa golin e vetëm të sfidës e shënoi Lorenco Vila në minutën e 61-të.

E nis kështu me “këmbë të mbarë” trajneri Edi Martini eksperiencën e tij të katërt në krye të durrsakëve ndërsa synon që të ngritë skuadrën pasi ata po gjenden në vështirësi këtë sezon dhe aktualisht pavarësisht tre pikëve ndaj Kukësit, sërish mbeten të fundit me 11 pikë.

Ndërkaq, vijon periudhën e errët edhe Kukësi që shkon në kuotën e pesë ndeshjeve pa fitore, nga të cilat koleksionon plot katër humbje.

Aktualisht, verilindorët e drejtuar nga trajneri Enkeleid Dobi mbeten në kuotën e 12 pikëve në vend të tetë.

Ndërkohë, në sfidën tjetër, atë mes Bylisit dhe Laçit ishin kurbinasit ata që triumfuan me rezultatin 0-1. Vendimtar për skuadrën e drejtuar nga trajneri Gentjan Mezani ishte goli i shënuar nga Adeleke në minutën e 40-të të pjesës së parë.

Pas këtij suksesi, Laçi ngjitet në kuotën e 17 pikëve dhe mban vendin e gjashtë në klasifikim, ndërsa nga ana tjetër, ballshiotët janë në vend të nëntë me 12 pikë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.