Lajme

Abdixhiku për situatën në Veri: Çdo veprim të koordinohet me aleatët


Lumir Abdixhiku

Kryetari i Lidhjes Demokratike të Kosovës, Lumir Abdixhiku, ka reaguar pas situatës së krijuar në Veri të Kosovës, ku kryetarët e zgjedhur janë futur brenda objekteve të Komunës me asistencën e Policisë së Kosovës, për shkak të kundërshtimeve të serbëve lokalë.

Abdixhiku në mbledhjen e Këshillit të Përgjithshëm të LDK-së ka thënë se “dua t’i jap mbështetjen e LDK-së për djemtë tanë në veri që duhet ta shtrijnë sovranitetin në të gjithë territorin”.

“Por njëkohësisht i bëj thirrje Qeverisë që të shfrytëzojë të gjithë potencialin e vet diplomatik, të koordinojë çdo përpjekje me aleatët në mënyrë që të sigurojnë funksionimin e rregullt të institucioneve tona në veri dhe shmangien nga çfarëdo gracke potenciale destabilizuese nga Serbia e më pas që na përkthehen në koncesione të tjera dialoguese”, potencoi ai.

Ndërkaq, kreu i LDK-së ka theksuar se përgjegjësia dhe sjellja e matur është jetike për funksionimin e Republikës së Kosovës”.

Po ashtu, edhe deputeti i Lidhjes Demokratike të Kosovës, Avdullah Hoti, ka reaguar përmes një postimi në rrjetin social Facebook për situatën e krijuar në Veri të Kosovës.

“Ligj dhe rend në të gjithë Kosovën. Edhe në veri”, ka shkruar Hoti fillimisht në Facebook.

Ndërkaq, ish-kryeministri potencoi se “veprimet duhet të jenë të menduara dhe të përgatitura mirë”.

“Në veçanti dhe DOMOSDOSHMËRISHT të koordinuara me miqtë e Kosovës”, pohoi Hoti.

Avdullah Hoti

Gjithashtu, edhe Ambasadori i Shteteve të Bashkuara të Amerikës në Kosovë, Jeffrey Hovenier, përmes një postimi në rrjetin e tij social në Twitter ka reaguar pas situatës së krijuar në Veri të Kosovës.

Top-diplomati amerikan ka dënuar veprimet e Qeverisë së Kosovës për të hyrë në ndërtesat komunale në Veri të Kosovës.

Sipas tij masat dhunshme të autoriteteve kosovare duhet të ndërpriten menjëherë.

“Shtetet e Bashkuara dënojnë veprimet e vazhdueshme të autoriteteve kosovare për të hyrë në ndërtesat komunale në Veri të Kosovës. Masat e sotme të dhunshme duhet të ndërpriten menjëherë”, ka shkruar Hovenier në Twitter.

Jeffrey Hovenier

Në mesditën e së premtes në katër komunat me shumicë serbe në Veri të Kosovës u dëgjuan sirena alarmi si paralajmërime për serbët lokal të cilët më pas bllokuan qasjen për në objektet komunale të Komunës së Zveçanit, Leposaviqit dhe Zubin Potokut.

Arsyeja e lëshimit të alarmit dhe rrjedhimisht tubimit të serbëve lokal në ndërtesat e Kuvendeve Komunale ka për qëllim pengimin e kryetarëve të rinj të cilët kanë tentuar të hyjnë në hapësirat e komunave.

Albanian Post raportoi mbi aksionin e Qeverisë së Kosovës, e cila është vendosur që të marrë objektet komunale nga strukturat paralele në atë mënyrë që kryetarët e rinj ta vazhdojnë mandatin në ndërtesat e komunave.

Sipas të njëjtave burime, qeveria paraprakisht i ka njoftuar edhe ambasadat e shteteve të QUINT-it (ShBA, Britani e Madhe, Gjermani, Francë, Itali) në Kosovë, por nuk ka gjetur pajtimin e tyre për këtë veprim.

Megjithatë përkundër tubimit të serbëve lokalë në ndërtesat komunave repsektive në Veri, me ndihmën e Policisë së Kosovës kryetari i Komunës së Zveçanit, Ilir Peci dhe kryetari i Komunës së Zubin Potokut, Izmir Zeqiri kanë arritur të futen në ndërtesat komunale.

Në këto dy komuna Policia e Kosovës ka arritur të “thyej” turmën e protestuesve serbë duke e liruar edhe objektet e Komunave.

Policia e Kosovës u detyrua të përdorë gaz lotsjellës e shok bomba për të shpartalluar turmën e serbëve të cilët ishin mbledhur përpara ndërtesave komunale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore