Kosova, për Ambasadorin e Mbretërisë së Bashkuar, Nicolas Abbott, duhet të tregojë qartazi se cila është perspektiva e saj për të ardhmen.
Sipas Abbott, Mbretëria e Bashkuar dëshiron që Kosova të jetë një demokraci shumë-etnike dhe një vend që merr vendime në interes të pakicave.
“Kemi dëgjuar shumë në dialogun politik ndërmjet Kosovës dhe Serbisë të flitet për të kaluarën, por nuk kemi dëgjuar aq shumë sa i përket të ardhmes dhe besoj se është tejet më rëndësi që të ketë një lloj debati se çfarë dëshiron Kosova për të ardhmen. Pra çfarë po përpiqet të promovojë”, ka thënë Abbott në një intervistë për Radio Televizionin e Kosovës.
Ai ka ripërsëritur zhgënjimin në lidhje refuzimin që ka bërë Qeveria e Kosovës për zgjedhjet e Serbisë, duke shtuar ky ka qenë shembulli ku Mbretëria e Bashkuar ka menduar se Kosova nuk i ka plotësuar vlerat e një vendi që respekton të drejtat e pakicave.
“Për zgjedhjet e Serbisë ka pasur një precedent që nga viti 2012, ku QUINT-i dhe OSBE-ja kanë grumbulluar fletëvotimet, por në bisedat që kemi pasur me Qeverinë ata na e kanë bërë të qartë se nuk duan ta bëjnë më këtë gjë. Ne kemi shikuar opsione tjera dhe ia kemi ofruar ato Qeverisë, por ajo i ka refuzuar. Kjo është për keqardhje sepse mendoj se ka qenë një mundësi që Kosova të demonstrojë se është e gatshme për të treguar se pakicat, në këtë rast serbët mund të votojnë por gjithsesi i mbetet Qeverisë nëse dëshiron apo jo ta bëjë këtë“, ka theksuar Abbott.
Më tej, Abbott ka bërë të ditur se Mbretëria e Bashkuar mbështet anëtarësimin e Kosovës në NATO dhe në BE, por që sipas tij për këtë duhet të kalohen disa procese.
Sa i përket dialogut, ambasadori potencon se lufta në Ukrainë mund ta ndryshojë vëmendjen për problemet në Ballkanin Perëndimor, e mes tyre edhe dialogun.
“Besoj që dialogu duhet të jetë pjesë e një konteksti më të gjerë, sidomos pas luftës në Ukrainë, varet se sa do të ketë fokus në Ballkanin Perëndimor. Duhet të këtë angazhim të qeverisë për ta zgjidhur dialogun. Qeveria është në pushtet tashmë gati një vit dhe besoj se e ka më të qartë se çfarë është arritur dhe çfarë do ajo që të arrijë, e ne do t’i mbështesim në këtë drejtim”, tha ai.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
