Abazoviç vjen në Kosovë, takon krerët e shtetit dhe promovon një libër

Kryeministri me mandat teknik i Malit të Zi, Dritan Abazoviç, këtë të enjte do të arrijë për vizitë në Kosovë me ftesë të kryetarit të Aleancës Kosovare të Bizneseve (AKB), Agim Shahini dhe përfaqësuesve të tjerë të biznesit kosovar.

Shahini tha për Albanian Post se Abazoviç do të qëndrojë në Prishtinë për tri ditë me radhë dhe do të takohet krerët e institucioneve, por edhe përfaqësuesit e partive politike e atyre të bizneseve.

“Kryeministri Abazoviç, sot nesër dhe pasnesër do jetë në Kosovë. Ne si AKB jemi nikoqirë, po ashtu edhe institucionet e tjera shtetërore dhe lokale me qëllim që kjo vizitë të rritë bashkëpunimin ekonomik mes dy shteteve tona”, tha ai.

Po ashtu Abazoviç gjatë qëndrimit në Kosovë, do ta promovojë librin e tij më të ri dhe njëherit do të mbahet edhe një ceremoni ku kryeministri do të nderohet me çmimin ” Doctor Honoris Causa” nga Kolegji Unversum.

Ndryshe, kjo është vizita e parë e Abazoviç-it në Kosovë prej se është zgjedhur kryeministër në vitin 2022.

Qeveria e Kovës akoma nuk ka njoftuar zyrtarisht për ndonjë takim të Kurtit me Abazoviçin.

Takimi i të dyve, nëse veç ndodhë, pritet të jetë jashtëzakonisht interesant, sidomos pas qëndrimeve të fundit të Kurtit për presidentin e ri malazez, Jakov Milatoviç, i cili është përkrahur nga Abazoviçi.

Kurti ishte deklaruar hapur pak ditë para zgjedhjeve në Mal të Zi në favor të Milo Gjukanoviç-it dhe kundër Milatoviç-it.

Për më tepër, Kurti kishte thënë se nuk fitoi Gjukanoviç, “rrezikon të shuhet kombi malazez”.

“Nëse fiton kundërkandidati i presidentit aktual, unë besoj që hapet rruga për zhdukjen e kombit malazez. Konkretisht, fitorja e çfarëdo kandidatëve, jo vetëm këtij (Milatoviç) pro-serb e pro-rus, në zgjedhjet (parlamentare) të qershorit që do të jenë pastaj, do të shënojë fitoren e radhës së Kishës Ortodokse Serbe”, ishte shprehur Kurti duke komentuar zgjedhjet në Mal të Zi.

Kurti e mbështeti Gjukanoviç-in, sulmoi Milatoviç-in – A do të ndikojë kjo në marrëdhëniet në mes të Kosovës dhe Malit të Zi?

Kosova gjithashtu, të paktën sipas Kurtit, akoma ka çështje të hapur me Malin e Zi demarkacionin e kufirit.

Kurti kishte pretenduar se Kosova është mashtruar dhe në caktimin e vijës kufitare ka humbur mijëra hektarë tokë, të cilat Mali i Zi duhet t’i kthejë.

Kurti me Abazoviçin kanë pasur dallime edhe sa i përket çështjes së Ballkanit të Hapur.

Derisa Abazoviç e sheh si mundësi të mirë bashkëpunimi, Kurtit e ka refuzuar kategorikisht anëtarësimin në këtë nismë që mori këmbët nga Shqipëria, Serbia dhe Maqedonia e Veriut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.