AAK-ja nuk do të votojë asnjë marrëveshje ndërkombëtare derisa të hyrat vetanake t’u kthehen komunave

Shefi i grupit parlamentar nga Aleanca për Ardhmërinë e Kosovës (AAK), Besnik Tahiri, pas mbledhjes së kryesisë ka bërë të ditur se është diskutuar për dy problematike që po e shoqërojnë Kosovën aktualisht.

E para ka qenë për të hyrat vetanake, kurse tema e dytë ka qenë që paga minimale të rritet.

Deri në rregullimin e problemit për të hyrat vetanake, AAK-ja ka marrë vendim që të mos votojë asnjë marrëveshje ndërkombëtare.

“E para ka të bëjë me problemin e të hyrave vetanake për komuna, ajo që të theksova është me shumë e thjeshtë Aleanca për Ardhmërinë e Kosovës nuk do të votoj asnjë marrëveshje ndërkombëtare nuk do të merr pjesë në asnjë proces të ligjeve përderisa nuk qartësohet kjo punë”, ka thënë Tahiri.

“Është plotësisht e padrejtë dhe e pakuptueshme që kur e kemi kaluar ligjin për buxhet në nenin që ka qenë amendamenti i Lidhjes Demokratike ne e kemi pasur një qëllim që të hyrat vetanake të shfrytëzohen nga komunat”.

Tahiri, tutje ka sqaruar se përse është kaq e rëndësishme që të hyrat vetanke të jenë në shërbim të komunave.

“Nuk ka asnjë kuptim që dikush që e paguan tatimin në pronë në fshatin Dragash që është e hyrë vetanake ajo e para të kthehet në Ministrinë e Financave e pastaj ajo të shpërndahet në një fshat tjetër. Kjo është logjika nuk e di si e mendon ministri i Financave”.

Kurse, për pagat minimale ai tha se sektori privat vazhdon të jetë i anashkaluar nga Qeveria e Kosovës.

Kjo tregon edhe për mosrritjen e kësaj page edhe pse kërkesa është bërë tash e tri vjet.

“Paga minimale vazhdon të jetë 170 euro, është viti i tretë që nuk ka asnjë lëvizje dhe nuk ka asnjë planifikim. Paga minimale urgjentisht duhet të rritet për sektorin privat që punojnë me orar e pa orar që punojnë në vikende”.

I pyetur për mbajtjen e zgjedhjeve në katër komunat veriore të Kosovës, Tahiri deklaroi se shteti i Serbisë, nuk mund të vendos më kushte ndaj Kosovës.

“Agjenda e Qeverisë së Serbisë nuk është e fshehur është armiqësore është tejet me synime destabilizuese ata po presin gabimet tona dhe këtu duhet të jetë i kujdesshëm kryeministri Kurti dhe Qeveria që të mos krijoj alibi sidomos tek faktori ndërkombëtar i udhëhequr nga SHBA-ja”.

“Serbia nuk mund t’i vendos kushte Kosovës, ka përfunduar ajo periudhë në vitin 1999”.

Marrja e të hyrave vetanake nga komunat ishte alarmi i ngritur nga Asociacioni i Komunave që kishte shqetësuar edhe kryetarët e komunave të cilët në këtë rast ishin “viktima”, pasi që Qeveria e Kosovës kishte marrë një vendim pa u dakorduar paraprakisht me vetë ata.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.