A rrezikohet Kosova pas luftës në Ukrainë?

Sulmi i Moskës ndaj Ukrainës, i nisur në orët e para të 24 shkurtit, përmes raketave të cilat janë nisur në aeroporte dhe infrastrukturë ushtarake në pothuajse në 25 qytete, bëri që të mendohej edhe për një konflikt në Ballkanin Perëndimor.

Presidenti rus, Vladimir Putin ka urdhëruar “operacion special” për të çmilitarizuar Ukrainën.

Edhe, samiti i Bashkimit Evropian bëri thirrje për nevojën e ruajtjes së stabilitetit në rajonin e Ballkanit Perëndimor.

Pikërisht pas këtyre sulmeve, presidentja e Kosovës, Vjosa Osmani është takuar me pjesëtarë të opozitës për të diskutuar situatën e sigurisë në vend.

Por, sa po mendohet nga ekspertët e fushës së sigurisë se është duke u rrezikuar Kosova të ketë një destabilizim pas tensioneve të fundit mes Rusisë dhe Ukrainës.

Njëri nga ekspertët e sigurisë në Kosovë, Avni Islami, i pyetur nga Albanian Post se sa rrezikohet Kosova pas luftës në Ukrainë, konsideroi se nuk pret që lufta mes këtyre dy shteteve të ketë implikime edhe në Kosovë.

“Në aspektin ushtarak nuk pres që të ketë implikime jo vetëm në Kosovë, por edhe në Ballkan për shkak se nuk mund të tërheqim paralele mes Ukrainës dhe Rusisë ngase Kosova dhe vendet e tjera të rajonit”, deklaroi Islami për AP.

Por, ndryshe thotë ai për njërin nga vendet e Ballkanit.

“Përveç, Serbisë të cilët janë në fokus të aleancës veri atlantike dhe duke pasur parasysh se sovraniteti dhe integriteti territorial i Kosovës është i garantuar nga trupat e KFOR-it të përbëra nga anëtarët e NATO-s”.

Ai sqaroi se edhe Rusia ka qëllime të caktuara e që kanë të bëjnë me raportin Kosovë – Serbi.

“Kësisoj pavarësisht Rusia është e interesuar që të tërhiqet ajo paralele dhe të implikojë edhe të tjera sidomos edhe Serbinë në raport me Kosovën, unë nuk pres që të ketë ndonjë veprim apo aventurë të dalluar nga ana e Serbisë sepse pasojat do të ishin të mëdha dhe katastrofale edhe për Serbinë”.

Ndërsa, për njohësin tjetër të sigurisë, Drizan Shala, situata në Ukrainë vazhdon të jetë enigmatike.

“Situata në Ukrainë ende është jo e qartë se si do të përfundoj invazimi ushtarak në Ukrainë dhe si do të mund të reflektoj kjo situatë në gjendjen e sigurisë në Ballkan në përgjithësi e në Kosovë në veçanti”, shprehet Shala.

Ai rekomandon institucionet shtetërore që të jenë të koordinuara në mbikëqyrjen e sigurisë dhe kontrollit të Kosovës.

“Kosova, niveli politik duhet që të jetë në gjendje të koordinojë veprimet strategjike për të garantuar sigurinë nacionale të Kosovës përmes NATO-s dhe Shteteve të Bashkuara të Amerikës”.

Sipas tij, në nivele më të larta duhet të veprojnë edhe misionet të cilat janë në Kosovë.

“Në nivel operacional duhet të veprojnë KFOR-i dhe EULEX-I, si dy misione të sigurisë në vend dhe të ketë bashkërendim të veprimeve në terren duke ruajtur sigurinë e përgjithshme të vendit”.

Shala shton se, “në veprimet taktike institucionet e sigurisë duhet që të vazhdojnë veprimet e tyre përmes monitorimit dhe reagimit sa më optimal si forcë e parë”.

Kosova i vendos sanksione Rusisë

Të premten e 25 shkurtit, Qeveria e Kosovës ka miratuar një pako me sanksione kundër Rusisë, pas pushtimit të Ukrainës.

Kryeministri i Kosovës, Albin Kurti, deklaroi se Kosova me këtë vendim u është bashkëngjitur Shteteve të Bashkuara të Amerikës (SHBA) dhe Bashkimit Evropian në kundërpërgjigjen ndaj sulmit rus në Ukrainë.

“Ushtria ruse është ajo e cila me këtë agresion e bëri Evropën të tronditet dhe arkitekturën e sigurisë ndërkombëtare të rimendohet”, ka thënë Kurti.

“Kjo Rusi që po shohim sot nuk është e re, por edhe një paralajmërim që ajo nuk synon të jetë e re”.

Ndërsa, ministrja për Punë të Jashtme dhe Diasporë në Kosovë, Donika Gërvalla, ka thënë se sulmi rus përbën “një ndër goditjet më të rrezikshme që i është bërë sigurisë evropiane dhe asaj ndërkombëtare në dekadën e fundit”.

Sakaq, ishte ministrja e Punëve të Jashtme, Donika Gërvalla, e cila bëri të ditur se masat ndërshkimore përfshijnë sanksionet ekonomike dhe financiare të vendosura nga Këshilli i BE-së dhe SHBA-ja.

“Sanksionet përfshijnë ngrirjen e aseteve të bankave, institucioneve financiare dhe individëve, ndalimi i qasjes së tyre në tregje financiare dhe masa të tjera restriktive që shenjtërojnë ndërmarrjet e rëndësishme ruse, elitat dhe akterët politike të përfshirë në marrjen e vendimit për invadimin rus në Ukrainë”.

Mehaj për sulmet ruse në Ukrainë: Nëse kërkon SHBA, Kosova do të ofrojë të gjitha kapacitetet operacionale të FSK-së

Edhe, ministri i Mbrojtjes në Kosovë, Armend Mehaj, ka reaguar pas sulme të Rusisë në Ukrainë duke thënë se nëse kërkohet nga Shtetet e Bashkuara të Amerikës, Kosova është e gatshme të ofrojë të gjitha aftësitë dhe kapacitetet operacionale të Forcave të Sigurisë së Kosovës.

Ai këto deklarime i ka bërë në rrjetin social ‘Facebook’.

“Në anën tjetër, nëse kërkohet nga SHBA, si partneri dhe aleati ynë jetik, për angazhimin tonë, jemi të gatshëm të ofrojmë të gjitha aftësitë dhe kapacitetet operacionale të FSK-së që ata vlerësojnë se mund të jenë kontributore në operacionet e mundshme”, ka shkruar Mehaj.

Kërkesë e Mehaj ka qenë që të miratohet vendosja e Bazës së Përhershme Ushtarake Amerikane në Kosovë.

Opozita kërkon marrëveshje përfundimtare me Serbinë

Në Kuvendin e Kosovës, më 25 shkurt është mbajtur seancë e jashtëzakonshme për të diskutuar rreth dialogut Kosovë – Serbi.

Deputët e partive opozitare kanë kërkuar nga Qeveria që të ndërpresë dialogun teknik me Serbinë dhe të vazhdojë me bisedimet e nivelit të lartë, me qëllim arritjen e marrëveshjes përfundimtare.

Kërkues i kësaj séance ishte kryetari i Aleancës për Ardhmërinë e Kosovës, Ramush Haradinaj, i cili tha se cështja e dialogut është interes kombëtar.

“Të kalojë në fazën finale dialogu, në marrëveshjen e madhe, me të cilën do të kërkohet njohja reciproke Kosovë-Serbi, në kufijtë ekzistues. Bazuar në tri parimet e dakorduara edhe me negociatorët ndërkombëtarë, pra: integriteti territorial, sovraniteti dhe kushtetueshmëria”, tha Haradinaj.

Dialogu Kosovë – Serbi, me ndërmjetësim të Bashkimit Evropian, ka nisur në vitin 2011 fillimisht për cështje teknike, për të kaluar më vonë në nivel politik midis kryeministrash dhe presidentësh.

Ndryshe, Serbia dhe Bjellorusia, janë dy shtetet e vetme në Evropë që nuk e kanë dënuar agresionin rus në Ukrainë, e cila për të dytën ditë me radhë po sulmohet nga shteti rus.

Kosova solidarizohet me popullin ukrainas

“Ndaleni Luftën, Mbrojeni Ukrainën” “Shtëpia duhet të jetë një vend i sigurt” “Ne jemi me Ukrainën”, ishin disa prej mesazheve që mbanin në duar, një grup qytetarësh që kanë protestuar të premten pranë Zyrës Ndërlidhëse të Rusisë në Prishtinë, pas invazitonit rus në Ukrainë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com