Gërvalla: Hapja e Urës së Ibrit, simbol i pajtimit dhe bashkimit

Ministrja e Punëve të Jashtme dhe Diasporës, Donika Gërvalla, ka kërkuar që Ura e Ibrit duhet të hapet dhe se Kosova është e përkushtuar ta zbatojë ligjin në çdo cep të territorit.

Kështu ka deklaruar Gërvalla në një konferencë për media me ministren e Punëve të Jashtme të Finlandës, Elina Valtonen, duke thënë se tashmë ka siguri në Veri.

“Kemi diskutuar edhe për sigurinë në Veri të vendit, e në veçanti për situatën e urës kryesore në Mitrovicë. Kjo urë, e cila ka simbolizuar ndarje dhe përçarje për shumë vite, duhet të hapet. Vetëm kështu ajo shndërrohet në një simbol të pajtimit dhe bashkimit”.

“Kosova është e përkushtuar ta zbatojë sundimin e ligjit në çdo cep të territorit të saj, duke garantuar të drejta të barabarta për gjithë qytetarët, pavarësisht përkatësive të tyre etnike”, ka thënë Gërvalla.

Ministrja finlandeze deklaroi se Kosova është e gatshme të thellojë edhe më tepër bashkëpunimin me Kosovën, përfshirë në fushat si digjitalizim, energji të pastër.

“Ne e kemi mbështetur Kosovën në rrugën drejt anëtarësimit në BE dhe jemi po ashtu mbështetës në rrugën që Kosova të bëhet anëtare e NATO-s…Finlanda është e gatshme të punojë intensivisht për t’i shtuar raportet tona tregtare dhe forcuar sektorët premtues të vendeve tona si digjitalizimi, energjia e pastër”.

Teksa ka theksuar se çështje diskutimi mes tyre ka qenë edhe dialogu Kosovë-Serbi.

“Kemi biseduar për agresionin rus në Ukrainë dhe për Finlandën është e qartë se Ukraina ka nevojë të mbështetet dhe Finlanda do ta mbështesë për aq kohë sa të jetë e nevojshme. Diskutuam për dialogun për normalizimin e marrëdhënieve mes Kosovës dhe Serbisë. Jemi të gatshëm të bëjmë çfarë të mundemi të ju mbështesim në rrugën e normalizimit”, tha Valtonen.

“Ne në Kosovë e kuptojmë më mirë se kushdo tjetër ndoshta rëndësinë e mbrojtjes së vlerave demokratike dhe të drejtës për vetëvendosje”.

Pas Gërvallës, Valtonen do të takohet edhe me kryeministrin e Kosovës, Albin Kurti.

“Kryeministri i Republikës së Kosovës, Albin Kurti, pret në takim Ministren e Punëve të Jashtme të Finlandës, Elina Valtonen”, është thënë nga Zyra e Kryeministrit.

MPJ e Finlandës, kishte njoftuar se qëllimi i vizitës është forcimi i marrëdhënieve politike dhe tregtare me partnerët e Finlandës me Ballkanin Perëndimor.

Ndërkaq, gjatë takimeve është thënë se do të diskutohet për marrëdhëniet dypalëshe, zgjerimin e BE-së, stabilitetin dhe sigurinë në Ballkanin Perëndimor, për situatën në Ukrainë dhe çështjet aktuale që lidhen me Organizatën për Siguri dhe Bashkëpunim në Evropë (OSBE).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.