![](https://albanianpost.com/wp-content/uploads/2024/05/Untitled-204.png)
Çdo vend anëtar i NATO-s që ka dërguar armë në Ukrainë është i lirë të vendosë nëse do t’i lërë të lirë ukrainasit të përdorin armë edhe në territorin rus apo të vendosin kufizime.
Kështu deklaroi sekretari i përgjithshëm i Aleancës Atlantike, norvegjezi Jens Stoltenberg.
Sekretari i kthehet temës nga Sofja, pasi tha në një intervistë me “Economist” se do të ishte e nevojshme të hiqet ndalimi i përdorimit të armëve të dërguara në Ukrainë në territorin rus.
Kjo sepse “ukrainasit i kanë duart e lidhura dhe në vend të kësaj kanë të drejtë të vetëmbrohen”.
Ministri i Jashtëm rus, Sergey Lavrov, akuzon Stoltenberg se ka shkuar shumë përtej kompetencave të tij dhe se ka tentuar të anashkalojë qeveritë e veçanta perëndimore për këtë vendim.
“Ai nuk mund ta marrë këtë përgjegjësi, ai e ka tejkaluar autoritetin e tij”.
Vendet anëtare ndjekin rrugën e tyre për këtë çështje.
Tashmë më 2 maj, Mbretëria e Bashkuar, përmes ministrit të Jashtëm David Cameron, tha se ukrainasit mund t’i përdorin armët e dërguara nga Londra sipas dëshirës.
Në administratën e Bidenit, siç raporton New York Times, ka një debat të fortë, i cili sheh nga njëra anë shefin e diplomacisë, sekretarin e shtetit, Antony Blinken dhe atë të Pentagonit, Lloyd Austin, në favor të eliminimit të kufizimeve dhe nga ana tjetër, Këshilltari i Sigurisë Kombëtare, Jake Sullivan, i cili dëshiron t’i mbajë ato në fuqi.
Spanja, Gjermania dhe Italia janë kundër.
Vendet baltike dhe Polonia, megjithatë, janë në favor dhe në të vërtetë po mendojnë, shkruan Spiegel, të dërgojnë gjithashtu trupa në Ukrainë në rast se rusët përparojnë shumë.
Dje komandanti i përgjithshëm i forcave ukrainase, gjenerali Olaksandr Syrsky, njoftoi në Telegram se kishte autorizuar ardhjen e instruktorëve ushtarakë francezë, të cilët do të trajnojnë trupat në Ukrainë.
Së shpejti, thotë Syrsky, ata do të vizitojnë qendrat tona të trajnimit dhe do të fillojnë të familjarizohen me infrastrukturën dhe personelin.
Njoftimi ngre shumë pyetje: sa ushtarë francezë do të jenë?
Dhe çfarë do të ndodhë nëse ata goditen nga një bombardim rus?
Presidenti francez, Emmanuel Macron, në mars dhe në maj tha se ishte gati të dërgonte një kontigjent ushtarak dhe kjo duket të jetë një lëvizje përgatitore – ose të paktën një mesazh për Kremlinin.
Situata është veçanërisht e rëndë në Kharkiv, qyteti i dytë i Ukrainës, i cili është i ekspozuar ndaj bastisjeve ruse sepse është vetëm tridhjetë kilometra larg territorit rus.
Për më tepër, në fakt, armët e dërguara nga vendet e NATO-s janë përdorur për vite me radhë kundër objektivave ushtarake në Krime – të cilat Rusia i aneksoi zyrtarisht në mars 2014 – dhe në territoret e pushtuara ukrainase të cilat u aneksuan në shtator 2022.
Nga pikëpamja teorike, goditja e një anijeje ruse të ankoruar në Sevastopol në Krime me një raketë amerikane ose goditja e një depoje municioni në Belgorod duhet të jetë e njëjta gjë.
Për më tepër, Ukraina ka përdorur tashmë armë amerikane në territorin rus, edhe nëse marrim parasysh vetëm territorin e vërtetë rus: në maj 2023 një bateri e raketave amerikane Patriot e operuar nga ushtarët ukrainas rrëzuan dy avionë dhe dy helikopterë përtej kufirit dhe nuk ishte fillimi i përshkallëzimi ndërkombëtar i kërcënuar nga Moska.
Raketa të tjera amerikane të lëshuara nga avionët ukrainas – AGM-88 Harm – u përdorën në Belgorod, gjithashtu në territorin rus.
Marrë nga “Repubblica”, përshtatur për Albanian Post
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com