![](https://albanianpost.com/wp-content/uploads/2024/05/opu.......................png)
Evropa është e ndarë në reagimet e saj ndaj kërkesës së prokurorit të Gjykatës Ndërkombëtare Penale (ICC) në Hagë, i cili thirri urdhër-arrestet për kryeministrin izraelit Benjamin Netanyahu dhe ministrin e tij të Mbrojtjes Yoav Gallant.
Franca ishte ndër vendet e para evropiane që komentoi aktakuzën, duke përsëritur mbështetjen e saj për “pavarësinë e ICC-së”.
Një zëdhënëse e Ministrisë së Jashtme, specifikoi se “për sa i përket Izraelit, do t’i takojë Dhomës së Procedurës Paraprake të Gjykatës të vendosë për urdhrat, pasi të ketë shqyrtuar provat e paraqitura nga prokurori, duke marrë parasysh parimin e komplementaritetit dhe veprimin e mundshëm të juridiksioneve izraelite”.
Megjithatë, një reagim shumë i ndryshëm erdhi nga Gjermania.
Në Ministrinë e Jashtme të udhëhequr nga Annalena Baerbock, dënimi i njëkohshëm i kryeministrit izraelit Netanyahu dhe Hamasit nuk shkoi mirë: “Të jep ndjenjën mashtruese të një barazie”.
Rrethanat që do të shqyrtohen, pohon një zëdhënës i ministrisë, “janë shumë të ndryshme nga njëra-tjetra”.
Kurse Hamasi, nënvizoi zëdhënësi, ishte fajtor për një “masakër barbare” më 7 tetor, po përdor popullsinë civile si mburojë njerëzore, po mban pengjet izraelitë të kapur ditën e masakrës “në kushte të papërshkrueshme”.
Dhe se qeveria izraelite “ka të drejtën dhe detyrën të mbrojë qytetarët e saj nga ngjarje të tilla”.
Edhe pse është e qartë, përfundoi zëdhënësi i Baerbock, të drejtat e njeriut “duhen respektuar”.
Parisi dhe Berlini me sa duket nuk janë koordinuar, edhe pse dje ministri Stéphane Sejourné korrigjoi qëllimin, duke na ftuar që të mos i vendosim Izraelin dhe Hamasin në të njëjtin nivel.
“Nuk janë ekuivalente”, nënvizoi Sejourné, duke arritur kështu qëndrimin e shprehur mbrëmjen e së hënës nga homologu i tij italian, Antonio Tajani.
Sejourné kujtoi se Hamasi është “një grup terrorist që feston sulmet e 7 tetorit ndërsa Izraeli është një shtet demokratik që duhet të respektojë ligjin ndërkombëtar në drejtimin e një lufte që nuk e nisi”.
Përçarja që po hapet në Evropë mund të jetë fatale për stabilitetin e Gjykatës Ndërkombëtare të krijuar në vitin 1998 me Statutin e Romës dhe që hyri në fuqi në vitin 2002.
Me pasoja që nuk humbasin për regjimin e Moskës, i cili nxitoi të kritikonte gjoja “standardet e dyfishta të Perëndimit” për punën e Gjykatës, e cila vitin e kaluar lëshoi një urdhër arresti kundër presidentit rus Vladimir Putin duke e akuzuar atë për deportimin e fëmijëve në Ukrainën e pushtuar nga trupat ruse.
Dhe nëse në Madrid ministri i Jashtëm përsërit “përkushtimin ndaj Gjykatës Ndërkombëtare Penale për punën e saj vendimtare”, në Budapest kryeministri hungarez Viktor Orbán e përkufizoi vendimin e prokurorit si “absurd dhe të turpshëm”.
Kurse kreu i diplomacisë evropiane, Josep Borrell, ka kujtuar se “të gjitha shtetet që kanë ratifikuar Statutin e GJNP-së janë të detyruara të zbatojnë vendimet e Gjykatës”.
Nëse gjyqtarët në Hagë do të vendosnin të lëshonin këto urdhër-arreste, teorikisht të 124 shtetet anëtare të Gjykatës do të ishin të detyruara të arrestonin personat në fjalë nëse do të udhëtonin në territorin e tyre.
Megjithatë, një zëdhënës i Shërbimit të Veprimit të Jashtëm të Komisionit Evropian sqaroi se “edhe nëse arrestimet konfirmohen nga trupa e procedurës paraprake, nuk nënkupton një vendim fajësie”.
Marrë nga “La Repubblica”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com