![](https://albanianpost.com/wp-content/uploads/2024/04/WhatsApp-Image-2024-04-19-at-2.38.37-PM.jpeg)
Presidenti i Republikës së Shqipërisë, Bajram Begaj, zhvilloi sot një vizitë zyrtare në Urdhrin Sovran të Maltës, i ftuar për kremtimin e 30-vjetorit të marrëdhënieve diplomatike me Shqipërinë.
Ai u prit në një ceremoni të veçantë në Vilën Magjistrale nga Lartësia e Tij e Nderuar, Fra’ John Dunlap, Princ dhe Mjeshtër i Madh i Urdhrit Sovran të Maltës.
Gjatë bisedës me Mjeshtrin e Madh të Urdhrit Sovran të Maltës, Begaj u shpreh për intensifikimin e bashkëpunimit me bindjen e nisjes së një faze të re, ndërsa e vlerësoi të suksesshme periudhën 30-vjecare të marrëdhënieve dypalëshe sidomos në fushën humanitare dhe shëndetësore.
Kreu i Shtetit theksoi se solidariteti dhe humanizmi i këtij Urdhri ka lënë gjurmë në Shqipëri përmes realizimit të projekteve në fushat e shëndetësisë, arsimit dhe asistencës sociale për shtresat në nevojë.
Një mirënjohje të veçantë Presidenti i Republikës përcolli për ndihmën nga Urdhri Sovran i Maltës në rimëkëmbjen e Shqipërisë pas tërmetit shkatërrimtar të nëntorit të vitit 2019, si dhe për kontributin e vullnetarëve të “Malteser Albania”, të cilët kujdesen për njerëzit në nevojë nëpërmjet shërbimeve mjekësore, sociale dhe humanitare.
Shqipëria, – u shpreh Presidenti Begaj, – do të mbështesë gjithmonë angazhimin e Urdhrit të Maltës në fushën e diplomacisë humanitare dhe dialogut ndërfetar, pasi vetëm në këtë mënyrë rritet kontributi i përbashkët në favor të paqes dhe solidaritetit humanitar në botë.
Presidenti i Republikës i përcolli Mjeshtrit të Madh të Urdhrit të Maltës falënderime për ndihmën në Kosovë gjatë luftës, duke e ftuar që kjo ndihmë të vazhdojë edhe në drejtim të zgjerimit të njohjeve ndërkombëtare të Kosovës, pasi shqiptarët e cilësojnë Urdhri Sovran të Maltës si një mik dhe avokat të tyre.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com