Pas drejtorit sportiv, Napoli gjen edhe trajnerin te Juventusi

Napoli është shumë afër zyrtarizimit të Giovanni Manna-s si drejtor sportiv, me italianin që pret vetëm të mbyllë sezonin me Juventus-in, pavarësisht se ishte nën kontratë deri në verën e 2025. Megjithatë, ai mund të mos vijë vetëm.

Sipas mediave italiane, Napoli interesohet edhe për trajnerin e Juventus-it, Massimilano Allegri, i cili mund të largohet nga “Zonja e Vjetër” në fund të sezonit.

Trajneri 56-vjeçar italian ka ende pak më shumë se një vit nga kontrata e tij me bardhezinjtë, por pritet gjerësisht të shkarkohet në verë, duke lejuar drejtorin Cristiano Giuntoli të fillojë ndërtimin e një projekti të ri në Piemonte, raporton “Il Mattino”.

Napoli ende nuk ka zgjedhur një trajner të ri afatgjatë përpara largimit të mundshëm të Francesco Calzona-s në verë, por janë lidhur me një sërë opsionesh, duke përfshirë Antonio Conte, Vincenzo Italiano, Stefano Pioli dhe madje edhe Gian Piero Gasperini.

Siç raportohet nga “Il Mattino”, Manna është gati të marrë postin e drejtorit sportiv të Napoli-t dhe ai po mendon për idenë e sjelljes së Allegri-t në brigjet e Campania pas shkarkimit të tij të mundshëm nga Juventus-i në verë.

“Zonja e Vjetër” mund të kërkojë të ndërpresë kontratën e trajnerit një vit më herët duke paguar gjysmën e pagës së tij dhe duke e lejuar atë të lidhet me Napoli-n.

Marrëdhënia mes Allegri-t dhe Aurelio de Laurentiis është e fortë, por presidenti është pak i shqetësuar për reagimet e fansave dhe shtypit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.