![](https://albanianpost.com/wp-content/uploads/2023/05/Vucevic.jpg)
“Ministria e Mbrojtjes dhe Shtabi i Përgjithshëm nuk do të heqin dorë nga iniciativa për rifillimin e shërbimit ushtarak”.
Kështu ka thënë për Radio Televizionin e Serbisë, ministri i Mbrojtjes Millosh Vuçeviç, derisa ka theksuar se kjo nuk është thirrje për luftë.
“E kemi dorëzuar një nismë zyrtare te kabineti ushtarak i presidentit të shtetit. Do të dëgjojmë deklaratat e tij, pra bashkëpunëtorëve të tij. Pas kësaj, ka një dëgjim publik. Instanca e fundit është qeveria”, tha ai.
Duke folur për situatën në Kosovë, Vuçeviç vlerësoi se realiteti është se kundër serbëve në Kosovë “janë duke u nisur procedura të reja gjyqësore për krime të supozuara lufte” dhe sipas tij në këtë mënyrë po i dërgohet mesazh gjithë komunitetit serb se nuk janë të mirëpritur.
“Së dyti, është e sigurt që presionet politike vazhdojnë, presionet e përgjithshme politike ndaj Republikës së Serbisë për çështjen e Kosovës, por jo vetëm për çështjen e Kosovës. Një periudhë aspak e lehtë”, potencoi ai.
Siç shtoi ai, Beogradi duhet të vazhdojë të jetë maksimalisht konstruktiv, duke mbrojtur interesat shtetërore dhe kombëtare, por edhe “do ketë vija të kuqe”.
Vuçeviç potencoi se nuk është optimist se Kosova dhe Serbia do të arrijnë një marrëveshje deri në fund të vitit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com