Diplomati kroat: Vuçiç është në situatë të pashpresë, ai nxiti idenë se Serbia s’do ta njohë kurrë Kosovën

Analisti i politikës së jashtme dhe ish-ambasadori kroat në Federatën Ruse, Bozo Kovaçeviç, duke komentuar mundësinë e një konflikti të mundshëm në Ballkan, ka thënë se furnizimi i konflikteve në rajon ka qenë një konstante e politikës ruse që kur Vladimir Putin erdhi në pushtet në vitin 2000.

Kovaçeviç ka vlerësuar se edhe Presidenti i Serbisë, Aleksandër Vuçiç, aktualisht është në një situatë “të pashpresë”.

“E pakënaqur me shpërndarjen unipolare të pushtetit në sistemin e marrëdhënieve ndërkombëtare, Rusia vazhdimisht u përpoq të vendosej si një nga ato pole në sistemin e marrëdhënieve ndërkombëtare. Prandaj, Rusia gjithashtu dëshiron të demonstrojë në Ballkan se problemet nuk mund të zgjidhen pa pjesëmarrjen e saj”, ka thënë diplomati kroat për rrjetin ballkanik të lajmeve “N1”.

“Rusia reagon në mënyrë identike në konfliktin mes Izraelit dhe Gazës dhe në mënyrë shumë më drastike, duke ndërhyrë në Siri, Moska tregoi se SHBA-të nuk mund t’i zgjidhin problemet e vetme”, shtoi.

Prandaj, beson ai, politika e Rusisë ndaj Ballkanit duhet parë në kontekstin e një përpjekjeje “për të provuar se problemet nuk mund të zgjidhen askund në botë pa të”.

Në vlerësimin e tij, “situata e Vuçiç-it është tragjike, pothuajse e pashpresë”, teksa shton se presidenti serbe është ai që ushqeu publikisht idenë se “Serbia nuk do ta njohë kurrë Kosovën dhe se nuk do të normalizojë marrëdhëniet me Prishtinën”.

“Nga ana tjetër, ai u pajtua me zgjidhjet e ofruara nga Bashkimi Evropian dhe SHBA. Problemi i tij i dytë është se ai gjoja dëshiron ta fusë Serbinë në BE, por nuk dëshiron të pranojë kushtet kryesore për vazhdimin e negociatave për anëtarësim”.

“Dhe kjo ka të bëjë me marrëdhëniet me Rusinë dhe Kinën. Të jemi të qartë, çdo vend sovran i njohur ndërkombëtarisht mund të bëjë çfarëdo politike të jashtme që do, por nëse dëshiron të hyjë në një klub të caktuar siç është BE-ja, atëherë duhet të respektojë rregullat e atij klubi”.

Dhe në këtë drejtim, pohon Kovaçeviç, qëndrimi i Vuçiç-it është tragjik”.

I pyetur se sa më afër është Ballkani me një konflikt të ri se dhjetë vjet më parë, ai thotë se është “padyshim më afër, sidomos duke pasur parasysh ngjarjet e fundit në manastirin e Banjës”, duke iu referuar sulmit terrorist të 24 shtatorit.

“Dhe Presidenti i Republika Srpska [entiteti serb në Bosnje e Hercegovinë], Milorad Dodik, ka mprehur retorikën e tij, kështu që është e qartë se intensifikimi i tensionit global po transmetohet edhe në Ballkan. Serbia duhet të vendosë vetë se çfarë do”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.