Ambasadori francez dënon sulmet ndaj gazetarëve

Ambasadori i Francës në Kosovë, Olivier Guerot, ka dënuar sulet ndaj gazetarëve në Veri.

Guerot përmes një cicërime në rrjetin social “Twitter”, ka thënë se “kërcënimet dhe dhuna ndaj gazetarëve shqiptarë dhe serbë të Kosovës është e papranueshme”.

“Kemi nevojë për media të lira dhe të pavarura. Veçanërisht këtyre ditëve”, ka shkruar ai në “Twitter”.

Threats and violence against journalists, K/Serbs and K/Albanians, are unacceptable. We need free and independent media. Especially in these days. @KoSSevnews @rtklivecom @AGK_AJK

— Ambassadeur Olivier Guerot (@Olivier_Guerot) June 16, 2023

Ndryshe, edhe Ambasada e Shteteve të Bashkuara të Amerikës në Kosovë ka dënuar sulmet e serbëve në Veri ndaj gazetarëve.

Përmes një cicërime në rrjetin social “Twitter”, ata thanë se “ne dënojmë sulmet e vazhdueshme ndaj gazetarëve në Veri të Kosovës, duke përfshirë edhe sot”.

“Ne përsërisim thirrjen tonë që mediat të jenë në gjendje të punojnë pa dhunë dhe frikësim”, shkruan ata në Twitter.

Në komunën e Leposaviqit është sulmuar fizikisht kameramani i Radio Televizionit të Kosovës (RTK), Bardh Bekteshi, i cili ka pësuar lëndime të rënda edhe në kokë edhe në trup, por përveç kësaj atij i është thyer edhe kamera.

Për këtë ka reaguar ashpër edhe Asociacioni i Gazetarëve i Kosovës.

“Ekipet mediale nga Prishtina kanë qenë sot cak i një sulmi brutal derisa po kryenin punën e tyre në Leposaviq. Kameramani i RTK-së, Bardh Bekteshi, është sulmuar fizikisht siç shihet në videon shqetësuese të dërguar në Asociacionin e Gazetarëve të Kosovës, nga ekipet në terren”.

“Përveç sulmit fizik, Bekteshit i është thyer edhe kamera e xhirimit”, thuhet në komunikatën e AGK-së.

Ndërsa, në një deklaratë për AGK-në, gazetarja Venera Xhoxhaj, ka treguar se protestuesit i kanë gjuajtur me gurë ekipet e mediave, Tëvë1, RTV Dukagjini, RTK, Klan Kosova dhe KTV.

“Na kanë gjuajtur me gurë, disa kolegë derisa kanë qenë duke u larguar, janë rrëzuar, dhe kameramanit tonë, Bardh Bekteshi, e kanë shtyrë duke e rrëzuar pastaj edhe  sulmuar fizikisht duke i shkaktuar lëndime në kokë dhe trup”.

Nga AGK-ja i është bërë thirrje urgjente Policisë së Kosovës dhe prezencës ndërkombëtare në këtë komunë, që t’u ofrojnë siguri gazetarëve dhe kameramanëve të cilët janë duke qëndruar në atë komunë.

Teksa e kanë dënuar ashpër këtë sulm duke thënë se për të gjitha këto sulme që kanë ndodhur në veri të vendit, do të informohen organizatat ndërkombëtare që merren me sigurinë e gazetarëve dhe lirinë e medias.

Për dallim nga situata e dhjetorit kur ishin vendosur barrikada në Veri për 17 ditë e ku u sulmuan 13 punëtorë të medias, gjendja e ditëve të fundit tregon edhe për një realitet akoma më të ashpër për raportimin e gazetarëve nga Veriu.

Për vetëm katër ditë në këtë pjesë u shënuan 20 sulme ndaj mediave sërish nga persona të maskuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.