![](https://albanianpost.com/wp-content/uploads/2023/03/Don-Bosko-AP-1.jpg)
12 orë pas atentatit në Don Bosko, autoritetet kanë gjetur makinën e autorëve të ngjarjes së rëndë të së dielës.
Rreth orës 08:00, në vendin e quajtur “Ura e Sulë Meres”, në territorin e fshatit Likmetaj, shërbimet e Policisë të Stacionit të Policisë Manzë kanë konstatuar të djegur plotësisht, një automjet tip “BMW”, brenda të cilit janë gjetur 3 armë zjarri automatike.
Nga hetimet paraprake dyshohet se ky automjet është përdorur për kryerjen e ngjarjes së mbrëmshme, në rrugën “Ananstas Shundi”, Don Bosko, Tiranë.
Grupi i posaçëm hetimor i ngritur në Drejtorinë Vendore të Policisë Tiranë, me qëllim zbardhjen e kësaj ngjarjeje, identifikimin dhe kapjen e autorëve, vijon punën në bashkëpunim me specialistët e Institutit të Policisë Shkencore, për të dokumentuar lidhjen e automjetit të djegur, me ngjarjen e ndodhur mbrëmjen e djeshme, në Tiranë.
Atentati i autorëve synonte pikërisht pronarin e barit, Fatjon Muratin.
Ky i fundit nuk është një emër i panjohur për Drejtësinë.
Ai ka qenë miku i Endrit Dokles dhe ishte arrestuar në tetor të vitit të kaluar.
Ai u u arrestua më 8 tetor nga Policia e Tiranës, pasi ishte shpallur në kërkim, për zotërimin e një arsenali armësh të sekuestruara gjatë muajit korrik.
Murati ishte duke lëvizur në një makinë të blinduar, me Endrit Doklen dhe kunatin e tij Gentian Ruçi.
32-vjeçari ishte shpallur në kërkim nga Policia sepse efektivët kishin gjetur gjurmët e tij të gishtërinjve në kutinë e një arme, ditën kur u zbulua edhe baza e armatimeve në Tiranë, që i përkiste Kristjan Gjinit.
Murati deklaroi asokohe se nuk kishte lidhje me arsenalin e armëve, por sipas tij gjithçka është aksidentale.
Fatjon Murati ka qenë një ndër personat që është kërkuar gjithashtu nga Prokuroria e Kurbinit për t’u marrë në pyetje lidhur me masakrën me tre të vrarë në Fushë-Krujë.
Kjo, për shkak të dyshimeve se ka qenë një nga organizatorët e atentatit.
Incidenti
Si pasojë e të shtënave, humbi jetën shtetasja Mimoza Paja, rreth 60 vjeçe, banakierja e lokalit.
Ngjarja, sipas autoriteteve ka ndodhur nga persona ende të paidentifikuar.
Nga të shtënat mbetën të plagosur pesë persona: S. M., 50 vjeç, A. M.,42 vjeç, E. S., 47 vjeç, E. B., 45 vjeç, G. Sh., 55 vjeç, të cilët ndodhen nën kujdesin e mjekëve jashtë rrezikut për jetën.
Gjithashtu u dëmtua në dorë nga ciflat e xhamave, një e mitur 10-vjeçare.
Ngjarja e rëndë është regjistruar në rrugën “Anastas Shundi”, pranë zonës së Don Boskos rreth orës 21:05.
Policia sqaron se për hetimin e kësaj ngjarjeje është ngritur një grup i posaçëm hetimor.
Nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
Ndërkohë janë ngritur pika kontrolli në bashkëpunim me Drejtoritë Vendore të Policisë Durrës, Elbasan, Lezhë e Dibër.
Reagimet
Kryedemokrati Sali Berisha do të reagonte menjëherë pas ngjarjes së rëndë në kryeqytet duke dënuar “autorët e kësaj masakre”.
“Dënoj me forcën më të madhe autorët e kësaj masakre dhe denoncoj lidhjet e tmerrshme të qeveritarëve me bandat dhe krimin, si faktori më kryesor që ka vendosur rendin dhe sigurinë në duart e bandave të lidhura ngushtë me qeverinë”, shkruan ish-kryeministri.
Në përmbyllje, Berisha i shprehu ngushëllime familjes së viktimës dhe uroi shërim të shpejtë të plagosurve.
“Pa kaluar dy javë nga vrasja makabre e tre grave të pafajshme krimi godet sërish, kësaj radhe duke rrezikuar në mënyrë ekstreme jetën e njerëzve të pafajshëm në lagjen e Don Boskos. Kriminelët lëvizin lirshëm në rrugët e Tiranës dhe rrezikojnë çdo ditë jetën e qytetarëve”.
Kështu shkruante kreu i Partisë së Lirisë pas ngjarjes së rëndë të 12 marsit.
Sipas tij, kjo situatë e rendit dhe sigurisë publike, “që përkeqësohet çdo ditë dhe çdo orë tregon qartë se qeverisja e Rilindjes ka dështuar totalisht dhe e ka futur vendin në kaos”.
Ish-presidenti shtoi se Qeveria nuk ka bërë asgjë për ndalimin e kriminalitetit, rritjen e sigurisë dhe parandalimin e veprave kriminale ndaj të cilave po ekspozohen të pambrojtur qytetarët shqiptarë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com