![](https://albanianpost.com/wp-content/uploads/2023/02/iol.lkhi_..png)
Dhjetëra palestinezë bllokuan hyrjet në lagjen Jabel Mukaber në lindje të Jerusalemit për të protestuar ndaj prishjes së shtëpive, të cilat u kryen nga autoritetet izraelite.
Përfaqësuesit e fraksioneve palestineze dhe kryefamiljarët në lagje shpallën një grevë të përgjithshme të martën e 31 janarit si pjesë e protestës.
Protesta përfshinte gjithashtu mbylljen e bizneseve dhe shkollave dhe punëtorët nga lagjja nuk do të punonin jashtë saj.
Protestuesit dogjën goma dhe kosha plehrash dhe hodhën gurë mbi forcat izraelite teksa oficerët e Policisë Kufitare i shtynin protestuesit prapa.
Sakaq, krerët e fraksioneve palestineze e kanë quajtur atë një “revoltë civile”.
Mohammed Bashir, një banor i Jabel Mukaber, ka treguar se për rreth 800 shtëpi ose struktura të tjera janë lëshuar urdhra për prishjen e tyre dhe zbatimi i planifikuar i urdhrave do të linte mijëra familje të pastreha.
“Këtu ka një përpjekje të qartë për të dëbuar njerëzit. Të ndërtosh një shtëpi sot në Jabel Mukaber, edhe nëse ke tokë, kushton 345 mijë dollarë edhe para se të marrësh një leje dhe mund të zgjasë deri në shtatë vjet, e ndoshta edhe 10 vjet”, ka thënë Bashir.
Në fillim të javës, ministri i Sigurisë Kombëtare Itamar Ben-Gvir njoftoi një “fushatë për prishjen e shtëpive” si rezultat i sulmit terrorist në lagjen Neveh Yaakov të kryeqytetit të premten, në të cilin shtatë hebrenj u vranë pranë një sinagoge.
Të nesërmen, Ben-Gvir ka thënë se kishte një listë të gjatë hapash që ai synonte të ndërmerrte. “Për habinë time, ka dhjetëra shtëpi që mund të prishen. Shpresoj se nuk do të hasim në vështirësi”.
Por duket se deklaratat janë larg asaj që po ndodh realisht në terren.
Të hënën, një dyqan ushqimor dhe një mur mbështetës u shkatërruan në Jabel Mukaber, kurse të dielën u shkatërruan tre banesa të së njëjtës familje.
Dhe autoritetet nuk kanë dhënë të dhëna për numrin e prishjeve dhe po ia kalojnë përgjegjësinë njëri-tjetrit.
Qyteti ka vetëm një urdhër prishjeje në fuqi dhe të gjitha prishjet e tjera të shtëpive janë rezultat i urdhrave të prishjes të lëshuara nga Njësia Kombëtare për Zbatimin e Ligjeve të Planifikimit dhe Ndërtimit, sipas një zyrtari të qytetit.
Tani për tani, banorët e lagjes janë të bindur se “fushata e prishjes” përfaqëson dënimin kolektiv që Ben-Gvir po udhëheq si rezultat i sulmit terrorist në Neveh Yaakov.
Aktivistët palestinezë në Jabel Mukaber kanë theksuar se qëllimi i operacionit izraelit të shkatërrimit në ditët e fundit në lagje – edhe nëse shtëpitë nuk do të prisheshin – ishte të dërgonte një mesazh paralajmërues për banorët.
Marrë nga “Haaretz”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com