Krasniqi takohet me Escobar: Për Kosovën, rreshtimi dhe koordinimi me SHBA-të është i pa alternativë

Kryetari i Partisë Demokratike të Kosovës, Memli Krasniqi në kuadër të vizitës së tij zyrtare në Shtetet e Bashkuara të Amerikës (SHBA) është takuar me përfaqësuesin e Shteteve të Bashkuara të Amerikës për Ballkanin, Gabriel Escobar.

Takimin e ka bërë të ditur Krasniqi përmes një shkrimi në rrjetin social ‘Facebook’.

“Z. Escobar i shpreha edhe një herë qëndrimin e vazhdueshëm të PDK-së në lidhje me procesin e dialogut me Serbinë dhe nevojën e arritjes së një marrëveshjeje gjithëpërfshirëse, ligjërisht dhe ndërkombëtarisht të obligueshme, që përfshinë njohjen reciproke”, ka thënë Krasniqi.

Ai ka theksuar edhe rolin e rëndësishme të SHBA-ve për Kosovën.

“Për Kosovën, rreshtimi dhe koordinimi me SHBA-të është i pa alternativë në rrugën e integrimit dhe forcimit të shtetit tonë. Fuqizimi i raporteve bilaterale dhe strategjike ndërmjet Kosovës dhe SHBA-ve është i padiskutueshëm dhe i pandryshueshëm”.

Më 31 janar, është takuar edhe kreu i Aleancës për Ardhmërinë e Kosovës, Ramush Haradinaj me emisarin amerikan Escobar me të cilin ka diskutuar për zhvillimet politike në Kosovë.

“Në një takim të hapur dhe të sinqertë diskutuam zhvillimet politike në Kosovë, me theks të veçantë nevojën për arritjen e marrëveshjes finale, ligjërisht të obligueshme në mes të Kosovës dhe Serbisë”.

“Falënderova z. Escobar për angazhimin e tij dhe të administratës amerikane tash e shumë dekada dhe inkurajova për thellim të marrëdhënieve dhe që mbështetja ndaj Kosovës të shtohet”.

Ai ka shtuar se do të punojnë ngushtë me SHBA-të që partneriteti për paqe dhe anëtarësimi i Kosovës në NATO të arrihet me urgjencë pasi që është jetike për paqe të qëndrueshme në rajon.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.