Ndalimi i Trajkoviç’it, Kurti ankohet te Escobari dhe Borrelli: Hakmarrje ndaj serbëve që e respektojnë ligjin

Kryeministri i Kosovës, Albin Kurti, përmes një cicërime në rrjetin social Twitter, ka reaguar për ndalimin Rada Trajkoviç’it nga autoritetet serbe.

Ai në postimin e tij ka etiketuar kryediplomatin evropian, Josep Borrell, emisarin special të BE-së për dialogun Kosovë-Serbi, Miroslav Lajçak dhe zëvendës-sekretarit amerikan të Shtetit për Evropën edhe Euroazinë, Gabriel Escobar, duke iu bërë thirrje që të marrin masa për lirimin e saj.

“Ndalimi 10-orësh në kufi nga regjimi autokratik serb të Rada Trajkoviç’it, këshilltare e ministrit Nenad Rasiç, për herë të dytë këtë javë, është shkelje e rëndë e të drejtave të njeriut dhe hakmarrje tipike ndaj serbëve që respektojnë ligjin”.

Ndryshe, Trajkoviç ishte nisur nga Serbia për në Kosovë, për tu takuar me ambasadorin e Shteteve të Bashkuara në Prishtinë, Jeffrey Hovenier, por në kufi asaj iu ndalua hyrja në Kosovë pa asnjë arsyetim zyrtar, ani pse e njëjta pas disa orë pritjeje arriti të futet në territorin kosovar.

Ministrja e Punëve të Jashtme të Kosovës, Donika Gërvalla, në mbledhjen e Qeverisë së Kosovës, ka bërë të ditur se ka informuar Zyrën e Bashkimit Evropian dhe janë kontaktuar ambasadat e shteteve të QUINT-it, për rastin e ndalimit të politikanes serbe, e cila ka më shumë se 10 orë që po mbahet në vendkalimin në Merdarë dhe nuk po lejohet të hyjë në Serbi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.