![](https://albanianpost.com/wp-content/uploads/2022/03/P051324-426468.jpg)
Presidenti i SHBA-ve, Joe Biden, dhe presidentja e Komisionit Evropian, Ursula von der Leyen, njoftuan të premten ngritjen e një grupi pune të përbashkët për të punuar në uljen e varësisë së Evropës nga nafta dhe gazi rus.
Task-forca, e kryesuar nga përfaqësues nga Shtëpia e Bardhë dhe Komisioni Evropian, do të synojë të gjejë furnizime alternative të gazit natyror të lëngshëm dhe të reduktojë kërkesën e përgjithshme për gaz natyror rus.
Ajo do të “punojë për të garantuar sigurinë energjetike për Ukrainën dhe BE-në në përgatitjen për dimrin e ardhshëm, ndërsa do të mbështesë qëllimin e BE-së për t’i dhënë fund varësisë së saj nga karburantet fosile ruse”, shkruhet në njoftimin zyrtar të Shtëpisë së Bardhë.
Sipas një zyrtari të BE-së, i cili kërkoi të mos identifikohej duke komentuar bisedimet private, importet shtesë nga SHBA-të do të kërkojnë kohë për të filluar, me Evropën të kufizuar nga kapaciteti aktual i rigazifikimit, numri i terminaleve dhe ndërlidhësve.
Shtetet e Bashkuara do të punojnë drejt furnizimit të Evropës me të paktën 15 miliardë metra kub gaz natyror të lëngshëm në vitin 2022, në partneritet me vendet e tjera, njoftoi Shtëpia e Bardhë.
Varësia e Evropës nga gazi dhe nafta ruse ka rezultuar një pikë e madhe pengese në përpjekjet perëndimore për të ndëshkuar Moskën për pushtimin e saj në Ukrainë.
Ndërsa SHBA-të ndaluan importet ruse të energjisë, Evropa e kishte shumë më të vështirë të ndërpresë furnizimet e saj.
Grupi do të punojë gjithashtu drejt reduktimit të emetimeve të gazeve serrë duke ulur emetimet e metanit dhe duke përdorur energji të pastër.
Nafta dhe produktet e naftës janë eksportet më të rëndësishme të Rusisë deri më tani. Gazi është eksporti i tretë më i vlefshëm dhe vlen më shumë se të gjitha eksportet e tjera së bashku. Të ardhurat nga eksporti i energjisë financojnë mbi 40% të buxhetit rus.
Klienti më i rëndësishëm i Rusisë është Bashkimi Evropian, i cili blen rreth 60% të eksporteve të gazit të vendit, 50% të eksporteve të naftës dhe 50% të eksporteve të produkteve të naftës. Evropa, që nga 24 shkurti, për këto produkte, i ka paguar më shumë se 19 miliardë dollarë Putinit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com