![](https://albanianpost.com/wp-content/uploads/2021/12/s_easterbrook_hero_1260x560_desktop.jpg)
Ish-shefi ekzekutiv i “McDonald’s”, Steve Easterbrook, i cili u përjashtua nga kompania në vitin 2019 për një marrëdhënie të papërshtatshme me një punonjëse, i ka kthyer kompanisë 105 milionë dollarë në para të gatshme dhe aksione në një nga kthimet më të mëdha në historinë e Amerikës së korporatave.
Easterbrook ka qenë i përfshirë në një betejë të diskutueshme me “McDonald’s” për vitin e kaluar, pasi kompania e paditi atë për gënjeshtra ndaj hetuesve në kohën e shkarkimit të tij.
Si pjesë e marrëveshjes së shpallur së fundmi, “McDonald’s” ra dakord të heqë dorë nga padia kundër Easterbrook.
Në një mesazh për punonjësit, Enrique Hernandez Jr., kryetar i “McDonald’s”, ka thënë se kompania dëshironte ta mbante zotin Easterbrook si “përgjegjës për gënjeshtrat dhe sjelljen e tij të keqe, duke përfshirë mënyrën në të cilën ai keqpërdori pozicionin e tij si kryetar” dhe se kjo marrëveshje e arriti atë qëllim.
Gjithsesi, Easterbrook u pushua nga puna në vitin 2019, pasi u angazhua në një marrëdhënie konsensuale me një punonjës në kundërshtim me politikën e kompanisë, duke shkaktuar përfundimisht një luftë jashtëzakonisht të ashpër midis një ekzekutivi të pasur dhe një prej kompanive më të shquara të vendit.
Në atë kohë, bordi i “McDonald’s” përcaktoi se Easterbrook “kishte demonstruar gjykim të dobët” dhe lejoi që Easterbrook të largohej me 40 milionë dollarë kompensim.
Por, sipas padisë së kompanisë kundër Easterbrook, kontrata e tij përmbante një dispozitë që do t’i lejonte “McDonald’s” të rikuperonte pagesat e ndarjes nga puna, nëse më vonë përcaktonte se punonjësi duhej të ishte pushuar nga puna pa shkak.
![](https://albanianpost.com/wp-content/uploads/2021/12/mcdonalds-1024x682.jpg)
Kjo klauzolë u bë e rëndësishme në vitin 2020, kur një punonjës i “McDonald’s” kishte thënë se Easterbrook, kishte një marrëdhënie seksuale me një vartës tjetër, ndërsa ai ishte shef ekzekutiv.
Akuza e re nxiti një tjetër hetim të të dhënave të Easterbrook dhe bëri që kompania ta padiste atë vitin e kaluar, duke akuzuar ish-shefin e saj për gënjeshtra, fshehje të provave dhe mashtrim.
Gjatë hetimit të tij për akuzën e dytë, “McDonald’s”, u tha se u gjetën, “dhjetëra fotografi dhe video nudo, ose seksualisht eksplicite të grave të ndryshme, duke përfshirë fotografitë e këtyre punonjësve të kompanisë, që Easterbrook i kishte dërguar si bashkëngjitje mesazheve nga llogaria e emailit të kompanisë së tij”.
Kompania zbuloi gjithashtu se Easterbrook i kishte dhënë aksione me vlerë qindra mijëra dollarë njërës prej grave me të cilat kishte marrëdhënie seksuale.
Në padinë e saj, “McDonald’s” thekson se ish-shefi i saj kishte gënjyer hetuesit në hetimin fillestar dhe se nëse ai “kishte qenë i sinqertë me hetuesit dhe nuk do të kishte fshehur provat, gjërat do të ishin ndryshe”.
Easterbrook fillimisht vendosi të luftonte padinë dhe avokatët e tij paraqitën një mocion për ta shkarkuar, duke e quajtur atë “të pamerituar dhe mashtruese”.
Por, me marrëveshjen e tij për t’i kthyer shumën e madhe të parave dhe aksioneve kompanisë, Easterbrook ka pranuar në mënyrë efektive atë që do të ishte një betejë e gjatë dhe e kushtueshme ligjore, prandaj kërkoi falje.
![](https://albanianpost.com/wp-content/uploads/2021/12/5f3160a158c24d7035138c42.jpg)
“Gjatë mandatit tim si shef ndonjëherë nuk arrita të mbaja vlerat e McDonald’s dhe të përmbushja disa nga përgjegjësitë e mia si udhëheqës i kompanisë”, tha ai.
“Unë u kërkoj falje ish-bashkëpunëtorëve të mi, bordit, ekskluziviteteve dhe furnitorëve të kompanisë që e kam bërë këtë”, ka shtuar ai.
Edhe pse McDonald’s ka postuar fitime të mëdha gjatë pandemisë, disa investitorë kanë qenë kritikë për mënyrën se si u bë shkarkimi i tij.
“Easterbrook do të kthente çmimet e kapitalit dhe paratë, me një vlerë aktuale prej më shumë se 105 milionë dollarë, të cilat ai do t’i kishte humbur nëse do të kishte qenë i sinqertë në kohën e përfundimit të tij”, u tha në një komunikatë të kompanisë.
Në më shumë se katër vitet e tij në këtë punë, Easterbrook u vlerësua me kthimin e “McDonald’s” dhe ringjalljen e çmimit të aksioneve.
![](https://albanianpost.com/wp-content/uploads/2021/12/shutterstock_1778181218.0-1024x683.jpg)
Kthimi i kompensimit të tij, megjithëse i madh, nuk është më i madhi në historinë e korporatës, ani pse shumë situata të mëparshme përfshinin akuza për mashtrim financiar ose kontabël.
Në vitin 2007, Komisioni i Letrave me Vlerë dhe i Shkëmbimeve rikuperoi më shumë se 400 milionë dollarë fitime të bëra nga William McGuire, ish-shefi ekzekutiv i United Health, për të zgjidhur pretendimet në lidhje me një skemë që përfshin kthimin e opsioneve.
Më vonë, “Tyco International” paditi një ish-drejtor ekzekutiv, Dennis Kozlowski, i cili ishte dënuar për plaçkitjen e kompanisë, në një përpjekje për të mbledhur 500 milionë dollarë që kishte marrë si kompensim dhe përfitime.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com