A ka rrezik nga çnjohjet dhe çfarë po bën Kosova?

“Deklaratat e njëanshme të njohjes së një shteti të lëshuara në formë zyrtare nga organet përfaqësuese shtetërore janë obligative dhe nuk mund të tërhiqen njëanshëm”.

Kështu është deklaruar për Albanian Post, profesori i së drejtës ndërkombëtare në Universitetin e Prishtinës, Besfort Rrecaj, duke shtuar se ky është edhe qëndrim zyrtarë i Gjykatës Ndërkombëtare të Drejtësisë si dhe të Komisionit të së Drejtës Ndërkombëtare të Organizatës së Kombeve të Bashkuara.

Ai, madje thekson se shumica e autorëve më eminentë të së drejtës ndërkombëtare janë të mendimit se njohja “de jure” (ligjërisht) e shtetit është e pakthyeshme, pasi sipas Rrecaj njohja e një shteti ka karakter deklarativ.

Rrecaj tregon se ai nuk e sheh të arsyeshme hezitimin e një shteti për ta njohur një shtet tjetër nëse do të ishte aq e lehtë tërheqja e njohjes.

Profesori i së drejtës ndërkombëtare ka komentuar edhe fushatën e shtetit serb për shtimin e çnjohjeve ndaj shtetësisë së Kosovës, fushat e cila sipas Rrecaj nuk prodhon asnjë efekt juridik.

“Të ashtuquajturat çnjohje vijnë nga shtete korruptive dhe si duket këto shtete nuk kanë aftësi për të njohur obligimet e veprimeve të tyre karshi shteteve tjera”, ka thënë Rrecaj për Albanian Post.

Por ai, ka bërë të ditur se këto manovra diplomatike nuk duhet të neglizhohen nga ana e Qeverisë së Kosovës, pasi sipas tij këto mund të reflektohen në sjelljen e atyre shteteve ndaj Kosovës sidomos për anëtarësim në organizatat të ndryshme ndërkombëtare.

Për këtë arsye, ai bënë thirrje diplomacisë kosovare, që përpos angazhimit për fuqizimin e subjektivitetit ndërkombëtar të shtetësisë së Kosovës, të angazhohet edhe me problematikën e çnjohjeve në bashkëpunim me partnerët strategjikë të Kosovës.

Edhe për politologun dhe njohësin e çështjeve ndërkombëtare, Arbnor Sadiku, i cili ka folur për Albanian Post, lobimi serb karshi çnjohjes së shtetit të Kosovës është i pa precedent, pasi sipas tij shtetet konsiderohet se kanë drejtë të njohin një shtet, por, jo më pas të bëjnë tërheqjen e njohjes së bërë në mënyrë të vullnetshme.

Sipas Sadikut, të gjitha çnjohjet karshi Kosovës kanë ardhur si pasojë e lobimit të Rusisë dhe Serbisë në disa vende të varfra të Afrikës, duke i joshur ata ekonomikisht apo edhe ushtarakisht, me mbështetje të dhënies së armëve falas.

Autoritetet në Beograd gjatë viteve kanë pretenduar se kanë arritur të sigurojnë tërheqjen e njohjeve të Kosovës nga më shumë se 15 shtete.

Ndërsa në anën tjetër këto pretendime në vazhdimësi janë hedhur poshtë nga autoritetet e Kosovës, duke i konsideruar këto deklarata propagandë të Serbisë.

Në anën tjetër, gjatë ditës së marte Nemanja Staroviç, Sekretari i Ministrisë së Punëve të Jashtme të Serbisë ka deklaruar se nëse Kosova fillon fushatë për anëtarësim në organizata ndërkombëtare, Serbia “do t’i përgjigjet në mënyrë adekuate”.

Ndër të tjera ai ka thënë se Serbia është në komunikim të vazhdueshëm me një numër vendesh që janë gati të tërheqin njohjen e shtetit të Kosovës.

Deri me tash, bazuar edhe në të dhënat e Ministrisë së Punëve të Jashtme të Kosovës, shteti i Kosovës është i njohur nga 117 shtete.

Njohja e fundit e pavarësisë së Kosovës ka ardhur nga shteti i Izraelit me 1 shkurt të këtij viti.

Me 4 shtator të këtij viti ka përfunduar edhe moratoriumi i cili rrjedh nga Marrëveshja e Uashingtonit, me të cilën u ndalua secili aktivitet të fushatës për mospranimin apo heqjen e njohjeve për shtetin e Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.