Data 9 prill shënon përvjetorin e Ditës së Sportit të Pastër. Që nga viti 2014, Agjencia Botërore Anti-Doping (WADA) dhe komuniteti anti-doping në të gjithë botën, kanë vendosur 9 prillin si ditën që do të përkujtojë lojën e pastër. Tema e këtij viti është “Çfarë do të thotë për ty ‘Luaj Pastër’?”.
WADA është fondacioni i krijuar nga Komiteti Olimpik Ndërkombetar me seli në Kanada, për të promovuar, koordinuar dhe monitoruar luftën kundër drogës në sport.
Veprimtaritë kryesore të agjencisë përfshijnë kërkimin shkencor, edukimin, zhvillimin e kapaciteteve anti-doping dhe monitorimin e Kodit Botëror Anti-Doping, dispozitat e të cilit zbatohen nga Konventa Ndërkombëtare e UNESCO-së kundër Dopingut në Sport.
WADA vendosi 9 prillin, si ditën që i kushtohet Sportit të Pastër dhe për të rritur ndërgjegjësimin tek atletët, publiku sportiv dhe te të gjithë ata që kanë lidhje me sportin.
Frymëzimi i përcaktimit të një dite të tillë buron nga Konferenca e Edukimit e organizuar nga WADA në 2013, e cila u ndoq nga 17 vende të Amerikës Latine. Dhe në vitin 2014 u vendos përfundimisht data 9 prill. Vitin e kaluar, për shkak të pandemisë, fushata e ndërgjegjësimit u bë online dhe u ndoq nga mbi 50 milionë shikues, individ dhe organizata nga e gjithë bota.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
