8 ndryshime në stilin e jetës për të jetuar gjatë

Miratimi i tetë ndryshimeve të stilit të jetesës, të tilla si ngrënia e mirë dhe gjumi i mirë i natës, mund të shtojnë më shumë se 20 vjet në jetën tuaj.

Të paktën kështu sugjeron një hulumtim i ri, i cili ka zbuluar se njerëzit kanë gjasa të jetojnë më gjatë kur bëjnë vetëm ndryshime të vogla, edhe nëse vonojnë përqafimin e zakoneve më të shëndetshme deri në moshën e mesme.

“Gjetjet tona të kërkimit sugjerojnë se adoptimi i një stili jetese të shëndetshëm është i rëndësishëm si për shëndetin publik ashtu edhe për mirëqenien personale”, ka thënë ekspertja Xuan-Mai T Nguyen.

“Sa më herët, aq më mirë, por edhe nëse bëni një ndryshim të vogël në të 40-at, 50-at ose 60-at, ai është ende i dobishëm”, ka shtuar ajo.

Hulumtimi, i prezantuar në takimin vjetor të Shoqatës Amerikane për Ushqyerjen në Boston, u bazua në të dhënat nga pyetësorët dhe të dhënat mjekësore të mbledhura midis viteve 2011 dhe 2019.

Të dhënat mbuluan më shumë se 700 mijë veteranë amerikanë të moshës 40 deri në 99 vjeç, të cilët ishin regjistruar në Programin e Çështjeve të Veteranëve.

Nguyen dhe kolegët e saj analizuan të dhënat për të identifikuar se cilët faktorë të stilit të jetesës ishin të lidhur me një jetëgjatësi më të gjatë.

Të dhënat mjekësore të mbledhura për projektin treguan se 33 mijë e 375 pjesëmarrës vdiqën gjatë periudhës së studimit.

Sipas ekipit, kur të dhënat kombinohen, faktorët e stilit të jetesës mund të kenë një ndikim thelbësor në jetëgjatësi, duke rritur jetëgjatësinë e një personi me dekada.

“Burrat dhe gratë që adoptuan tetë faktorë terapeutikë të stilit të jetesës mund të fitojnë respektivisht 23,7 ose 22,6 vjet jetëgjatësi, në moshën 40 vjeç krahasuar me ata që nuk kanë faktorë të adoptuar të stilit të jetesës”, kanë thënë autorët.

Të qenit fizikisht joaktiv, përdorimi i drogave opioid dhe pirja e duhanit kishin lidhjet më të forta me vdekshmërinë e hershme.

Pjesëmarrësit me këta faktorë të stilit të jetesës kishin një rrezik 30% – 45% më të lartë të vdekjes gjatë periudhës së studimit, zbuluan studiuesit.

Në të kundërt, stresi, pirja e tepërt, higjiena e dobët e gjumit dhe dieta e varfër u shoqëruan me rreth 20% rrezik më të lartë të vdekjes në periudhën e studiuar.

Tetë ndryshimet e stilit të jetesës që mund të zgjasin jetën tuaj:

Ushqehuni mirë.

Shmangni cigaret.

Bëni gjumë të mirë gjatë natës.

Jini fizikisht aktiv.

Menaxhoni stresin.

Shmangni pirjen e tepërt të alkoolit.

Jini të lirë nga varësia ndaj opioideve.

Kini marrëdhënie pozitive shoqërore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.