60 të vdekur nga sulmet ruse në Luhansk

Të paktën 60 persona mendohet se mund të kenë mbetur të vrarë gjatë sulmeve ruse në fshatin ukrainas Bilohorovika, në rajonin e Luhanskut.

Njerëzit e fshatit mendohet se ishin fshehur në një shkollë për t’u strehuar pikërisht nga granatimet ruse, por ky vendim ka rezultuar fatal për ta, pasi forcat e Moskës goditën pikërisht në objektin e edukimit.

Lajmin mbi numrin e viktimave e ka bërë të ditur paraprakisht Serhiy Gaidai, guvernatori i rajonit të Luhanskut, por shifrat ende mbetet të pavërtetuara plotërisht.

Sipas fjalës së Gaidait, rreth 90 persona kanë qenë të strehuar në objekt dhe pas arkëtimeve ruse, godinën e ka përfshirë një zjarr i madh. Prej ndërtesës janë nxjerrë 30 persona të gjallë, me dëmtime të lehta.

Mbi fatin e të tjerëve ende nuk dihet asgjë, por duke qenë se flakët e kanë pushtuar shkollën për mbi katër orë, paramendohet se ata nuk kanë pasur shans mbijetese.

Ishin forcat zjarrfikëse, ato të cilat kanë shkuar menjëherë në vendngjarje për të bërë të mundur fikjen e zjarrit, por lufta ka qenë e vështirë për shkak të përmasave.

Të gjetur deri tani janë trupat e dy njerëzve. Forcat zjarrfikëse po vijojnë kërkimet në gërmadha.

Një shpërthim tjetër ka ndodhur edhe në fshatin Shypilovo të Luhanskut, ku një shtëpi është goditur dhe 11 njerëz kanë mbetur nën rrënoja sipas Gaidait.

Mbi fatin e tyre ende nuk dihet asgjë, pasi po punohet për të gjetur trupat e tyre.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.