6 mijë përfitues nga ‘Fondi i Garancisë Sovrane’, Rama: E ardhmja e bujqësisë të shihet me syrin e inovacionit

“Është koha që çdo ditë ata që janë të angazhuar në prodhimin bujqësor të mendojnë me sytë nga e ardhmja dhe jo me mendjen nga e shkuara, por të shikohet me syrin e inovacionit. Koha e bujqësisë së lëmoshës, mbijetesës dhe subvencioneve pa kriter ka perënduar, si dhe koha e bujqësisë vetmitare ka mbaruar”.

Kështu është shprehur kryeministri i Shqipërisë, Edi Rama, mesditën e 26 janarit gjatë prezantimit të “Fondit të Garancisë Sovrane” për fermerët, duke bërë me dije se nga kjo e fundit kanë përfituar 6 mijë sipërmarrës.

Sipas Kryeministrit, sado që të bëjë qeveria dhe shteti “është e pamundur, që të garantohet një e ardhme më e mirë, prandaj fermerët duhet të shohin me syrin e energjive të reja e sipërmarrjeve që beson tek investimi i kapitaleve dhe te ndërveprimi me bankat”.

“Koha e shtetit shpëtimtar ka vdekur së bashku me komunizmin që krijoi iluzionin e shtetit shpëtimtar. Shteti është mbështetës dhe garant në aspektet që lidhen në lirinë e konkurrencës dhe garantimin e mekanizmave të aksesit në financa. Përtej kësaj, shpëtimtarët e të ardhmes janë ata që e kanë bërë historinë e suksesit”, theksoi Rama në fjalën e tij.

Duke e cilësuar si një sektor jetik bujqësinë dhe turizmin, kreu i qeverisë bëri me dije se me Bankën Evropiane për Rindërtim dhe Zhvillim janë alokuar 118 milionë euro për t’i ndihmuar që të lehtësohet financimi i tyre.

Ndër të tjera, numri një i qeverisë bëri një krahasim, duke përmendur eksportin në sektorin e peshimit që ka pësuar transformim.

“Sot indeksi i peshkimit tregon qartësisht transformimin që ka sjellë karakteri sipërmarrës i asaj fushe që, falë një numri jo shumë të madh, as të vogël të përfshirë, po kthehet në një histori suksesi. Një pamje që është fytyra e të ardhmes e tjetra e së shkuarës”, tha ai.

Por, sipas tij, edhe bujqësia ka parë përparim, pasi sot toka punohet dyfish më shumë seç ka qenë punuar.

Në përfundim kryeministri Rama u kërkoi strukturave që të japin më tepër informacion, asistencë teknike dhe më shumë investim për të rritur kapacitetet e dijes.

“Në emër të qeverisë shqiptare u kërkoj bankave të nivelit të dytë që të reflektojnë realisht vullnetin e tyre për të pasur një vëmendje më të madhe ndaj kërkesave të sektorit të bujqësisë”, e përmbylli Rama fjalën e tij.

E para ishte ministrja e Bujqësisë dhe Zhvillimit Rural, Frida Krifca, e cila nisi fjalimin duke u folur për këtë fond garancie fermerëve për të financuar kolateralin e kredive të bujqësisë.

“Nga fondi mbështetës prej 4 miliardë, 1 miliard lekë do t’i jepen vetëm bujqësisë, duke i dhënë kështu garanci Bankës Tregtare”, tha Krifca në fjalën e saj.

Po ashtu pjesëmarrëse në këtë takim ishte dhe ministrja e Financave dhe Ekonomisë, Delina Ibrahimaj.

Ajo theksoi faktin se kjo ka ardhur për të rritur zhvillimin në manifakturë, bujqësi dhe turizëm.

“Synimi ynë është rritja e produktivitetit dhe rritja e zinxhirit të vlerës të prodhimit ‘Made in Albania’”, vijoi Ibrahimaj në fjalën e saj.

Ndërsa fjalën e mori edhe Guvernatori i Bankës së Shqipërisë, Genc Sejko, i cili tha se tashmë ka ardhur koha që vëmendja të kthehet te sektori i bujqësisë.

Sejko, duke folur për garancinë sovrane për të financuar kolateralin e kredive të bujqësisë, tha se, “ky sektor gjeneron më pak se 20% të vlerës së shtuar në ekonomi”.

“Është e qartë se zhvillimi i qëndrueshëm i vendit kërkon vëmendje më të madhe te bujqësia, në rritjen e popullsisë rurale. Mbështetja me fonde e sistemit bujqësor meriton kredi më të madhe nga banka”, deklaroi Sejko.

Sa i përket problematikave të kreditimit, Sejko tha se “janë evidentuar me kohë”.

“Megjithatë mendoj se disa prej tyre janë drejt adresimit, ndërsa për pjesën tjetër zgjidhja e tyre duhet të jetë pjesë integrale e punës tonë. Sidoqoftë ky rrezik është drejt rehabilitimit”, vijoi ai.

Sipas tij, fermeri shqiptar ka nevojë për ndërgjegjësim më të madh dhe këto partneritete përmirësojnë askesin e fermerëve në kredi.

“Banka e Shqipërisë gjykon se ka ardhur koha të kthejë vëmendjen te bujqësia”, e përmbylli ai.