Është e vërtetë se roli i saj e ka imponuar në shtatë dekada një sertësi të vetë personit, por Mbretëresha Elizabeth II, e cila u nda nga jeta dy ditë më parë, nuk do të mbahet mend thjesht si një monarkë e madhe, por edhe si një figurë e dashur për publikun.
Me kalimin e viteve madje, ajo gjithnjë është bërë më shumë popullore, me paraqitje publike jashtë normales monarkike, duke mos shmangur as shakatë e shumta televizive.
Këto, janë gjashtë herët kur Mbretëresha, i bëri të gjithë të qeshin!
Jubileu me ariun Paddington
Si pjesë e kremtimit të 70-vjetorit mbretërim, i cili u mbajt këtë qershor për nder të Mbretëreshës Elizabeth II, një “party” me çaj u organizua, me një të ftuar aspak normal, por shumë të veçantë…ariun Paddington.
Një skeç mes të dyve zuri vend në programin e përgatitur nga media shtetërore britanike BBC në nder të jubileut mbretëror.
Pjesa qesharake?
Ariu Paddington i ofroi Mbretëreshës një sanduiç me marmalatë. “Unë e mbajt gjithnjë një rezervë për çdo rast”, i tha ai asaj.
Por, habia, erdhi kur Elizabetth II, nxorri gjithashtu një sanduiç dhe ia ktheu me batutën: Të njëjtën gjë bëj edhe unë!
Kur Mbretëresha takoi James Bond
Ai është agjenti më i famshëm në Britani, James Bond, i njohur ndryshe si 007, por kur bëhet bashkë me një figurë si Mbretëresha Elizabeth II, merr tërësisht tjetër substancë.
Kështu në fakt ndodhi në lojërat Olimpike të zhvilluara në Londër, në vitin 2012, kur aktori Daniel Craig, i cili kishte marrë përsipër rolin e agjentit më të famshëm në botë, “ndihmoi” Mbretëreshën të bënte një hyrje surprizë, nëpërmjet hedhjes me parashutë nga një helikopter.
Sigurisht, Elizabeth nuk u hodh vërtetë, por kur të pranishmit në ceremonie hapëse e panë teksa përshëndeste, brohorimat ishin shtangëse edhe për atë vetë.
Me nipin Harry kundër çiftit Obama
Ndoshta vitet e fundit nuk ka qenë raporti më i mirë i mundshëm, me shumë aspekte kontroverve pas martesës së princit Harry me aktoren Meghan Markle, por Mbretëresha Elizabeth II gjithnjë e ka shfaqur afeksionin për nipin e saj të vogël.
Në vitin 2016, një skeç mes tyre dhe çiftit presidencial Obama u bë viral, në kuadër të lojërave “Invictus”.
Asokohe, çifti Obama i dërgoi një videomesazh, ku i bënin thirrje pallatit mbretëror britanik të bëhej gati.
Përgjigja e Mbretëreshës? Një nënqeshje e lehtë dhe një fjali e shkurtër.
“Oh, të lutem”, i tha ajo Harryt buzagaz, duke nënkuptuar se as që e kishte “frikë” sfidën e ardhur nga Shtëpia e Bardhë.
Të presësh tortën më shpatë
E ç’e do thikën kur ke shpatën?
Ky është pikërisht rasti! Mbretëresha Elizabeth II gjenden në një ceremoni në Cornwall, së bashku me dukeshat Camilla dhe Kate.
Në celebrim e sipër, asaj iu kërkua të priste një tortë dhe menjëherë, ajo mori një shpatë ceremoniale për ta prerë copën e parë.
Duke parë madhësinë e shpatës (më të madhe se torta vetë), Kate dhe Camilla i thanë se aty gjendej edhe një thikë për të prerë tortën.
“E di që është aty”, i nënqeshi Mbretëresha, “por kjo është më e pazakontë”, e vazhdoi më pas ta printe tortën.
Photobomb
Sa herë ju është shfaqur pas një fotoje tuajën ndonjë person që ju ka tallur ose ka bërë ndonjë fytyrë të pazakontë, duke e prishur kështu pozën? Shumë apo jo?
Në vitin 2014, ishte pikërisht Mbretëresha Elizabeth II, ajo e cila e kreu një gjest të tillë, kur u shfaq në sfondin e fotos së dy lojtareve të hockey-t australian.
Fotografia e postuar nga lojtarja Jayde Taylor u bë menjëherë virale dhe mori komente të shumta.
Por, kur “photobomb”-ën ta bën Elizabeth II, është e kuptueshme që poza nuk prishet…veçse rregullohet.
Të zgërdhihesh ndaj një tufe bletësh
Është me shumë mundësi një nga ngjarjet më të pazakonta mbretërore në Britaninë e Madhe ndër vite.
Në 2003-shin, në Windsor Castle, një ceremoni po zhvillohej, ku të pranishëm ishin edhe Mbretëresha Elizabeth II dhe bashkëshorti i saj, Duka i Edinburgut, Philip.
Një koshere bletësh ra në tokë dhe bletët vetë dolën nga kontrolli, duke shkaktuar shumë rrëmujë e duke e prishur gjithë rendin e ceremonisë.
Çfarë bëri Elizabeth në vend se të ankohej?
Ia plasi të qeshurës si një vajzë e vogël, duke u zgërdhirë me gjithë shpirt për çfarë po ndodhte, siç dëshmojnë fotografët, të cilët ishin të pranishëm aty.
Për këto dhe shumë të tjera, ajo do të mbahet mend si një monarke, e cila dinte edhe të dilte nga korniza mbretërore e përcaktuar.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
