50 mijë pjesë koleksioni mbi Sherlock Holmes…në Empoli?!

Gabriele Mazzoni ishte mjek në jetën e tij aktive profesionale, derisa u pensionua kur plotësoi moshën e daljes nga tregu i punës.

Por, jetën e tij, ai kurrsesi nuk dëshiron ta mbyllë me atë kapitull, sepse një pasion i madh e ka kthyer në personazh kryesor të një rrëfimi të pazakontë.

Me 50 mijë pjesë autentike, Mazzoni është koleksionisti më i madh i artikujve të lidhur me hetuesin më të famshëm në botë, Sherlock Holmes.

Libra, revista, filma, statuja, objekte, ai ka gjithçka që lidhet me personazhin e krijuar mjeshtërisht nga Arthur Conan Doyle.

“Pasioni im filloi kur isha i vogël, rreth 7 vjeç. Fillimisht shihja serialin mbi personazhin. Ishte anglisht dhe bardhezi. E jepte Rai në vitin 1962”, thotë ai i përmalluar për atë kohë.

Për mjekun, hetuesi britanik është një personazh, i cili tejkalon çdo lloj arti. Që nga muzika, kinematografia, letërsia, Sherlock Holmes i prek të gjitha.

Për të, gjithsesi, nuk është thjesht çështje koleksionimi, por edhe prejardhjeje.

Mazzoni i përzgjedh me shumë kujdes pjesët e koleksionit që blen. Ai shikon me imtësi autorin e tyre, historikun dhe vlerën që mund ketë pjesë.

Ndër thesaret më të çmuara, janë volumet e Holmes, të shkruara në 70 gjuhë të ndryshme të botës.

Nëse më parë, për të, gjithçka ka qenë një pasion për atë pak kohë të lirë që i gjendej gjatë përditshmërisë si mjek, sot ky pasion ka marrë efekt me kohë të plotë në jetën e Mazzonit.

Një mjek, me shije shumë pasionante për detektivin më të famshëm në botë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.