Ikona e muzikës, Elvis Presley, kishte vdekur 44-vjet më parë në Memphis të Tennessesee së Shteteve të Bashkuara të Amerikës, duke lënë pas vetes një bagazh të pasur kulturor e artistik me këngë hite dhe kolona zanore të suksesshme në kinematografinë botërore.
Ai u gjet i vdekur në rezidencën e tij në Memphis, ndërsa mjekët thanë se – “ai vdiq nga një sulm në zemër, që mund të ishte i shkaktuar nga varësia e tij ndaj barbituratëve me recetë”.
Elvis Aaron Presley kishte lindur në Tupelo më 8 janar të vitit 1935, ndërsa u rrit në një familje të varfër dhe pasi arriti në një moshë kur mund të voziste, ai gjeti punë si shofer kamioni.
Kur Elvis ishte vetëm 19 vjeç, ai hyri në një studio regjistrimi në Memphis dhe pagoi 4 dollarë për të regjistruar disa këngë si dhuratë për nënën e tij.
Pronari i studios, Sam Philips, u intrigua nga cilësia e ashpër dhe shpirtërore e zërit të tij dhe e ftoi Presley-n përsëri për të bërë muzikë me disa muzikantë vendas.
Pasi Philips dëgjoi Elvisin të këndonte këngën ritmike “That All Right”, ata ranë dakord që ai të publikojë interpretimin si një këngë nën vulën e “Sun Records”.
Kënga rezultoi e suksesshme dhe aty filloi e gjithë karriera e Presley-t.
Një vit më pas, Elvis, ra në sytë e një kompanie tjetër, duke bërë që “Sun Records” të shisnin kontratën e tij për “RADIO Corporation of America”, për një shumë rekord prej 40 mijë dollarësh.
Kënga e tij “Hotel Heartbreak”, aso kohe u bë një sensacion në fillim të vitit 1956 duke u pasuar me hite të tjera të tilla si “Hound Dog” e “Don’t Be Cruel”.
Nga viti 1956 deri në vitin 1958, Elvis mbizotëronte në tabelat e muzikës së zhanrit “Rock and Roll”, ndërsa përfitoi edhe oferta kinematografike.
Presley në atë periudhë luajti në katër filma të suksesshëm, të cilat shfaqën kolona zanore të tij: “Love Me Tender” (1956), “Jailhouse Rock” (1957), “Loving You” (1957) dhe “King Creole” (1958).
Dikur, Presley, kishte shërbyer si rreshter, por më vonë në vitin 1960, ai e përfundoi këtë detyrë dhe u angazhua më shumë në muzikë, por rezultoi që ai të pësonte një ndryshim total të stilit.
Ai filloi t’i shmangej materialeve të nxituara, të frymëzuara nga ritmi dhe “blues” duke kaluar në favor të baladave romantike e dramatike si “Are you lonely tonight?”.
Elvis, po ashtu u tërhoq nga koncertet për t’u përqendruar në filmat e tij muzikorë, duke sjellë disa prodhime shumë të suksesshme të tilla si; “G.I. Blues” (1960), “Hawai Hawai” (1961), “Girls! Girls! Girls!”(1962), “Viva Las Vegas” (1964), dhe “Frankie dhe Johnny” (1966).
Në vitin 1967, ai u martua me Priscilla Beaulieu dhe çifti patën një vajzë, Lisa Marie.
Ndërkohë, në fund të viteve të 60-ta, muzika “rock and roll” kishte pësuar ndryshime dramatike dhe Elvis nuk shihej më si i rëndësishëm nga të rinjtë amerikanë.
Kënga e tij e fundit që rezultoi e suksesshme dhe arriti të futej në “Top 10”, ishte “Burning Love”, e lansuar në vitin 1972.
Megjithatë, ai ruajti pasurinë e tij të madhe përmes koncerteve fitimprurëse dhe paraqitjeve televizive.
Nga mesi i viteve të 70-ta, Elvis ishte në rënie të shëndetit fizik dhe mendor, ndërsa edhe u divorcua nga gruaja e tij në vitin 1973 dhe krijoi një varësi të rrezikshme nga ilaçet me recetë.
Ai ishte gjithashtu i varur nga ushqimi dhe fitoi peshë të konsiderueshme. Në dy vitet e fundit të jetës së tij, ai bëri shfaqje të çrregullta në skenë dhe jetoi pothuajse si “i izoluar”.
Pasditen e 16 gushtit të vitit 1977, ai u gjet pa ndjenja në rezidencën e tij në Graceland dhe u dërgua me urgjencë në spital, ku edhe u shpall i vdekur.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
