20 persona humbin jetën nga përmbytjet në Venezuelë, shumë të tjerë të zhdukur

Të paktën 20 persona kanë humbur jetën në shtetin perëndimor të Venezuelës, Merida, pas shirave të rrëmbyeshëm që shkaktuan rrëshqitje të dheut.

Venezuela është përfshirë nga përmbytje masive. Reuters shkruan se, të paktën 20 persona kanë humbur jetën, mbi 1 mijë e 200 shtëpi janë shkatërruar dhe 17 persona janë në kërkim.

Po ashtu bëhet me dije se janë përmbytur dhe shumë makina, banesa, biznese, ndërsa rrugët janë kthyer në lumenj.

Një zyrtar i partisë socialiste tha se po punonin për të rivendosur shërbimin telefonik në disa zona.

“Le të përpiqemi të mos e bëjmë këtë politike apo ideologjike”, tha Guevara, anëtar i partisë opozitare. “Le të kërkojmë të gjithë për një zgjidhje për problemin”.

Në pamjet e shpërndara në mediat sociale tregohen makina të përfshira në rrugë, ndërtesa dhe biznese të mbushura me baltë, si dhe rrëshqitje të dheut që shkaktuan dëme në rrugë.

Disa qytete në zonën e prekur, duke përfshirë Tovar, Bailadores, Zea dhe Santa Cruz de Mora janë pa energji elektrike, pasi ujërat e përmbytjeve dëmtuan transformatorët.

“As qeveria shtetërore dhe as bashkia nuk kanë burime për t’i ndihmuar zonat e prekura”, tha Guevara.

Ministri i Brendshëm u shpreh se, të paktën 54 mijë e 543 njerëz në shtatë komuna ishin prekur, përveç urave dhe rrugëve të dëmtuara.

Shtetet, të cilat mbeten në gjendje të jashtëzakonshme, janë: Merida, Tachira, Zulia, Apure, Amazonas, Bolivar, Delta Amacuro, Monagas dhe Aragua.

Deri më tani, 80 zjarrfikës dhe 60 zyrtarë të mbrojtjes civile nga Merida janë vendosur për operacione emergjente, përveç pjesëtarëve të forcave të armatosura të stacionuara në zonë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.