15 vdekje, rekord Infektimesh nga Covid-19/ Hapet Spitali Covid në Elbasan

Gjatë 24 orëve të fundit 15 persona kanë humbur betejën me coronavirusin dhe kanë rezultuar pozitivë 1 mijë e 21 qytetarë në Shqipëri.

Sipas njoftimit zyrtar të Ministrisë së Shëndetësisë dhe Mbrojtjes Sociale (MSHMS), shtatë qytetarë janë nga Tirana, dy nga Vlora, Berati, një nga Fieri, Korça, Librazhdi dhe nga Mati. Këta persona i përkasin grupmoshës 63-87 vjeç.

Ditën e sotme janë vaksinuar 1 mijë e 242 qytetarë. Që nga fillimi i vaksinimit janë kryer 7 mijë e 970 vaksina anti-Covid. Procesi i vaksinimit ka vijuar në tre qendrat e vaksinimit në Tiranë, Shkodër, Vlorë.

Aktualisht në spitalet COVID në Tiranë dhe në spitalet rajonale janë duke u trajtuar 648pacientë, 42 në terapi intensive nga të cilët 15 pacientë janë të intubuar.

Gjatë ditës së martë, më 23 shkurt, është hapur dhe spitali i Covid në qytetin e Elbasanit. Duke u zgjeruar kështu me tre spitale rajonale trajtimi i pacientëve me COVID-19.

Janë kryer 3 mijë e 998 testime dhe janë shëruar 1 mijë e 85 qytetarë.

Nga raporti shihet se është rritur numri i rasteve të reja dhe vdekjeve në Shqipëri. Gjithashtu shihet një rritje e rasteve të pacientëve që janë në terapi intensive duke i krahasuar me javën e kaluar.

Kujtojmë se më 11 shkurt ministrja Ogerta Manastirliu, ka deklaruar se janë marrë masa të reja përsa i përket parandalimit të coronavirus-it. U vendos ora policore nga 20:00-06:00. Kjo masë u shoqërua edhe me rritjen e gjobave për personat apo subjektet që shkelin ligjin.

Prandaj, Ministria ka bërë sërish thirrje që të vendoset maska, të shmangen grumbullimet, të ruhet distanca dhe të tregohet kujdes për higjienën vetjake.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.