Vrau çiftin e të moshuarve në Dropull, arrestohet autori
Vitjon Nina
05.05.2024 9:04Është zbardhur vrasja e një çifti të moshuarish në fshatin Brodishtë të Dropullit, ku Policia tashmë ka identifikuar dhe arrestuar edhe autorin e krimit.
Sipas njoftimeve policore, bëhet me dije se pas ekzaminimit të provave biologjike nga policia shkencore është identifikuar dhe arrestuar autori i vrasjes së Kosta dhe Kleoniqi Ilia, 84 dhe 88 vjeç.
Autori i krimit makabër, Thoma Mastora, ditën e ngjarjes ka shkuar në banesën e çiftit të të moshuarve, aty ku dyshohet se edhe ka pirë kafe me këto të fundit dhe më pas i vrarë me sende të forta.
E moshuara u gjet e pajetë në banesë, ndërsa 84-vjeçari u gjet i vdekur në oborrin e banesës së tyre.
Shkaku i krimit dyshohet të ketë qenë synimi i autorit të krimit që të marrë pronat (tokat) e çiftit të të moshuarve në fshatin Brodishtë, por policia po heton për zbardhjen e shkakut.
Çifti Ilia nuk kishin fëmijë biologjikë, por kishin një vajzë të birësuar të cilën nuk e kishin takuar prej 10 vitesh, e cila jetonte në Greqi.