Tenistja kineze hedh akuza ndaj ish-zëvendëskryeministrit për abuzim seksual

Tenistja kineze, Peng Shuai, ka akuzuar publikisht ish-zëvendëskryeministrin kinez, Zhang Gaoli, se e ka sulmuar seksualisht.

Në një postim në faqen e mediave sociale kineze Weibo, ylli i tenisit u shpreh se Gaoli e kishte “detyruar” të kryente marrëdhënie seksuale me të.

Është hera e parë që një akuzë e tillë bëhet kundrejt një prej liderëve të lartë politikë të Kinës.

Në postimin, bërë publik mbrëmjen e 2 nëntorit, 35-vjeçarja rrëfeu sesi pas dhunës lindi një lidhje e vrullshme me Zhang Gaolin, aktualisht 75 vjeç.

Megjithatë, pas vërshimeve të mijëra mesazheve nga persona të ndryshëm në pak minuta, postimi i tenistes kineze u hoq nga llogaria e saj.

Për disa orë në Kinë ishte e pamundur të bëje kërkime me emrin Peng, por edhe tenisin në përgjithësi.

Peng ka bërë të ditur se nuk kishte prova për atë që denonconte, ndërsa Këshilli i Shtetit nuk e ka komentuar lajmin.

“Edhe pse jam e vetme, do ta them të vërtetën për ty”, shkruante Peng Shuai.

Ajo ka treguar se agresioni ka ndodhur pasi Zhang, kur ishte me shërbim në Tianjin, e kishte ftuar të luante tenis me të dhe bashkëshorten e tij.

Në atë kohë, tenistja sapo kishte filluar karrierën si profesioniste.

Peng Shuai ka qenë një nga tenistet që është stërvitur dhe ka udhëtuar e vetme.

“Jemi të gjithë të shqetësuar për atë që mund t’i ndodhë”, ka deklaruar aktivisti kinez, Lu Pin, i cili tani jeton në New Jersey.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.