Shqipëria zyrtarisht anëtare e Qendrës Evropiane të Ekselencës kundër Kërcënimeve Hibride në Helsinki

Shqipëria është pranuar zyrtarisht si një anëtare e Qendrës Evropiane të Ekselencës kundër Kërcënimeve Hibride në Helsinki.

Kështu, duke e plotësuar tablonë e pranimit të të gjithë anëtarëve të Bashkimit Evropian dhe të aleancës së NATO-s, të cilat janë pjesë e kësaj organizate.

Një mesazh lidhur me këtë e ka shpërndarë edhe kryeministri shqiptar, Edi Rama, i cili bëri të ditur lajmin.

“Anëtarësimi kompleton pjesëmarrjen e të gjitha vendeve të BE dhe NATO në këtë organizatë, për të mundësuar kështu një qasje të unifikuar mes aleatësh kundër kërcënimeve hibride, Dizinformimit dhe Manipulimit të Informacionit nga Shtetet e Huaja”, shkruan Rama.

Nga ana tjetër, për ministrin për Evropën dhe Punët e Jashtme, Igli Hasani, ky është një hap i madh përpara.

“Kjo nënkupton një hap shumë të rëndësishëm përpara për Shqipërinë dhe ne jemi të prirur të kontribuojmë në misionin jetik të Qendrës”, tha ministri Hasani pas pranimit.