Qeveria suedeze nuk planifikon të mbajë një referendum nëse parlamenti i saj vendos të vazhdojë me një aplikim për anëtarësim në NATO.
Lajmi u bë i ditur nga agjencia Reuters, e cila citoi kryeministren suedeze Magdalena Andersson.
Pushtimi rus i Ukrainës ka detyruar si Suedinë ashtu edhe Finlandën të rishikojnë neutralitetin ushtarak.
Të dyja vendet pritet të marrin një vendim gjatë javëve të ardhshme.
Andersson u shpreh se referendumi ishte një “ide e keqe”.
“Unë nuk mendoj se është një çështje që është e përshtatshme për një referendum”, tha ajo para gazetarëve.
Parlamenti suedez po rishikon politikën e sigurisë me një raport që pritet në mes të majit.
Partia e Andersson, socialdemokratët, po shqyrton nëse do të heqë dorë nga kundërshtimet e saj ndaj anëtarësimit në NATO.
Me një shumicë në parlament që mbështet anëtarësimin, socialdemokratët në pushtet shihen si pengesa më e madhe për Suedinë që të aplikojë për t’u bashkuar me aleancën prej 30 vendesh.
Suedia mban zgjedhje të përgjithshme në shtator.
Një sondazh i opinionit nga Demoskop në të përditshmen Aftonbladet, i botuar më 20 prill, tregoi se 57 për qind e suedezëve ishin në favor të anëtarësimit në NATO.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
