Osmani takohet me policët që u kidnapuan nga Serbia: Ua njohim sakrificën në mbrojtje të çdo cepi të Republikës

Presidentja e Kosovës,Vjosa Osmani, të martën ka prituar në takim tre policët kufitarë të Kosovës – Beqir Sefa, Rifat Zeka dhe Shemë Mustafa – pas lirimit nga autoritetet e Serbisë pas më shumë se dy javësh prej kur ishin rrëmbyer në vijën kufitare në veri të Kosovës.

Presidentja Osmani, sipas një komunikate të lëshuar nga zyra për media, ju ka uruar mirëseardhje policëve dhe në të njëjtën kohë ka falënderuar gjithë Policinë e Kosovës për angazhimin e vazhdueshëm për një mjedis të sigurt dhe të qetë, ndërsa policët shprehën përkushtimin për vazhdimin e angazhimit të tyre.

“Policia e Kosovës është institucioni kyç për integritetin territorial dhe sovranitetin e vendit. Institucionet dhe qytetarët e Kosovës e njohin përkushtimin dhe sakrificën tuaj, por edhe të të gjitha grave dhe burrave në uniformë policore, të cilët e mbrojnë Republikën në çdo cep”, ka theksuar Presidentja Osmani.

Zyrtarët policorë të Kosovës– Rifat Zeka, Beqir Sefa dhe Mustafë Shemi – të rrëmbyer nga strukturat e sigurisë së Serbisë më 14 qershor, thellë brenda territorit të Kosovës në pjesën veriore, janë liruar për t’u mbrojtur në liri.

Ndonëse aktakuza kundër tre policëve kosovarë është konfirmuar nga Prokuroria e Lartë Publike në Kralevë – ata ngarkohen me veprën penale: prodhim, posedim, mbajtje dhe trafikim të paligjshëm të armëve dhe lëndëve plasëse – të njëjtit do të mbrohen në liri, pra është marrë vendimi t’u ndërpritet paraburgimi prej një muaji.

Rrëmbimi i tre policëve kosovarë në vendin e quajtur Tresave/Bare nga autoritetet serbe të sigurisë, kishte shtuar shtresa të reja në një atmosferë tashmë të njohur, por me rrezikun e rrëshqitjes drejt skajeve të përshkallëzimit të mëtejmë dhe ngjitjen drejt esktremeve.

Autoritetet e Kosovës e konsideruan fatin e tre zyrtarëve policorë si kidnapim nga autoritetet e Serbisë brenda territorit të Kosovës dhe agresion ndaj sovranitetit të shtetit, ndërsa autoritetet e Serbisë pretendonin se nuk bëhej fjalë për kidnapim, por për arrestim të policëve kosovarë brenda territorit serb.

Shtetet e QUINT-it (Shtetet e Bashkuara, Gjermania, Mbretëria e Bashkuar, Franca dhe Italia) kishin kërkuar lirimin e menjëhershëm dhe pa kushte të tre policëve të Kosovës. Edhe Bashkimi Evropian po ashtu vazhdimisht kishte kërkuar që të tre policët kosovarë të lirohen.

Kidnapimi i tre policëve kosovarë nga njësitet elitare të Serbisë në vijën kufitare me Kosovën, ndodhi pikërisht në një periudhë tensionesh të larta ndërmjet Kosovës dhe Serbisë, veçanërisht në pjesën veriore të Kosovës të banuar serbë etnikë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.