Orban: Derisa Serbia të hyjë në Bashkimin Evropian, ka të drejtë të ulet në dy karrige

Kryeministri i Hungarisë, Viktor Orban, i ka dalë në mbrojtje Serbisë sa i përket aleancave që kjo e fundit po i përforcon me vendet kundërshtare të perëndimit.

Për këtë ai përmendi marrëveshjen për tregti të lirë që Serbia e ka nënshkruar me Kinën, ku tha se e njëjta do të ishte e papranueshme nëse Beogradi do të ishte pjesë e Bashkimit Evropian, mirëpo, përderisa nuk e ka këtë status, sipas tij, Serbia “ka të drejtën të ulet në dy karrige”.

Këto komete, kryeministri hungarez i bëri në konferencën e kryetarëve të parlamenteve të Evropës Juglindore në Budapest, ku ka deklaruar se në Bashkimin Evropian ekziston një grup që e sheh zgjerimin si problem.

Ai shtoi se për Hungarinë zgjerimi i Bashkimit Evropian ishte gjithmonë një mundësi dhe diçka që duhej bërë.

“Nëse ne nuk e integrojmë këtë rajon të Evropës Juglindore, do të duan të tjerët. Meqë ne nuk e pranuam Serbinë, dolën të tjerët, kështu që tani kanë kontrata me Kinën”, ka potencuar Orban, transmeton media opozitare serbe “Danas”.

Sipas tij, lufta mes Rusisë dhe Ukrainës është duke ndikuar në pasigurinë e BE-së për zgjerimin e Unionit.

“Ne hungarezët jemi gati të paguajmë aq sa duhet për integrimin e Ballkanit Perëndimor. Mund të mbështeteni tek ne që rajoni Juglindor të bëhet anëtar sa më shpejt të jetë e mundur”, tha Orban.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.