Ndihmës Sekretari i Përgjithshëm i NATO-s diskuton me komandantin e KFOR-it për situatën e sigurisë në Kosovë

Komandanti i Forcës së NATO-s në Kosovë (KFOR), Ozkan Utulash, ka takuar Ndihmës Sekretarin e Përgjithshëm të NATO-s për Politikë të Jashtme dhe Siguri, Boris Ruge, ndërsa në fokus të diskutimeve ka qenë situata e përgjithshme sigurisë në vend dhe dialogu për normalizimin e raporteve Kosovë-Serbi nën ndërmjetësimin e Bashkimti Evorpian (BE).

“Ata shkëmbyen pikëpamje mbi një sërë temash, duke përfshirë trendet më të fundit të sigurisë, aktivitetet e KFOR-it dhe mbështetjen për dialogun e ndërmjetësuar nga BE midis Beogradit dhe Prishtinës”, ka njoftuar të hënën nëpërmjet një komunikate për shtyp misioni paqeruajtës i KFOR-it.

Ndryshe, takimi ndërmjet zyrtarit të lartë të NATO-s dhe komandantit turk të KFOR-it ka ardhur në kohën kur autoritetet kosovare kanë ndërmarrë disa veprime në pjesën veriore të Kosovës të banuar me shumicë serbe, përfshirë edhe inciativën për hapjen e urës kryesore mbi lumin Ibër në Mitrovicë.

KFOR-i ka paralajmëruar javën e kaluar se është i gatshëm t’i ndërmarrë “të gjitha masat e nevojshme” për t’i luftuar zhvillimet të cilat mund të cenojnë sigurinë dhe stabilitetin rajonal, pas zhvillimeve të fundit në veriun e trazuar të Kosovës të banuar kryesisht me serbë etnikë, dhe në përputhje me mandatin e Këshillit të Sigurimit të Kombeve të Bashkuara (OKB).

“Ne kemi një prani të dukshme dhe fleksibile në të gjithë Kosovën dhe komandanti i KFOR-it ka autoritetin ta rregullojë sipas nevojës dhe nuk do të hezitojë të veprojë në përgjigje të çdo zhvillimi të rëndësishëm të sigurisë dhe në përputhje me mandatin tonë të OKB-së”, ka deklaruar misioni.

Zyrtarë të Shteteve të Bashkuara (SHBA), përfshirë ambasadorin amerikan në Prishtinë, Jeff Hovenier, kanë alarmuar së fundi për rrezikun sa i përket hapjes së urës mbi lumin Ibër, që mund të ndikojë seriozisht në sigurinë e ushtarëve amerikanë në kuadër të misionit paqeruajtës të NATO-s.

SHBA-ja sheh kërcënim për ushtarët amerikanë në Kosovë: Çka paralajmëroi inteligjenca për Ballkanin Perëndimor?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.