Kurti pritet nga Borrell në Bruksel

Kryeministri i Kosovës, Albin Kurti, pas arritjes në Bruksel, është pritur nga Përfaqësuesi i Lartë i Bashkimit Evropian për Politikë të Jashtme dhe Çështje të Sigurisë, Josep Borrell.

Ai ka udhëtuar në Bruksel për të zhvilluar mbledhjen e katërt të Këshillit të Stabilizim-Asociimit (KSA) që do të mbahet të martën e shtatë dhjetorit.

Me Borrel dhe Komisionerin për Zgjerim dhe Fqinjësi, Oliver Varhelyi, Kurti do të diskutojë mbi marrëdhënien bilaterale ndërmjet Kosovës dhe BE-së në kontekstin e marrëveshjes kontraktuale të Stabilizim-Asociimit si pjesë e procesit të integrimit të Kosovës në BE.

Pas Borrell, kryeministri Kurti do të takojë edhe zyrtarë të tjerë të lartë të BE-së në kuadër të kësaj vizite.

Pjesë e këtij udhëtimi është edhe zëvendëskryeministri i parë, Besnik Bislimi.

“Delegacioni i plotë i kabinetit qeveritar i Kosovës përbëhet nga Zëvendëskryeministri i parë, Besnik Bislimi, Ministrja e Punëve të Jashtme dhe Diasporës, Donika Gërvalla, Ministri i Financave, Punës dhe Trasnfereve, Hekuran Murati”, thuhej në njoftimin e kryeministrisë.

Përveç tyre, pjesë e delegacionit janë edhe Ministri i Punëve të Brendshme, Xhelal Sveçla, Ministri i Mjedisit, Planifikimit Hapësinor dhe Infrastrukturës, Liburn Aliu dhe Zëvendësministrja e Drejtësisë, Nita Shala.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.