“Kosova, projekt i përkohshëm”: Vuçiç në OKB citon deklaratën e ministrit Aliu

Presidenti i Serbisë, Aleksandër Vuçiç, gjatë adresimit në seancën e Këshillit të Sigurimit të Organizatës së Kombeve të Bashkuara (OKB), citoi deklaratën skandaloze të Ministrit të Mjedisit, Planifikimit Hapësinor dhe Infrastrukturës (MMPH) në Kosovë, Liburn Aliu, i cili, në dhjetor të vitit të kaluar, deklaroi se Kosova është “projekt të përkohshëm”.

“Serbët janë arrestuar për shkelje të rendit kushtetues të Kosovës, ndërsa Aliu vazhdon të jetë i lirë, madje mban post ministror. Kaq sa i përket përsekutimit të serbëve”, deklaroi presidenti serb në seancën e OKB-së mbi raportin e ri gjashtëmujor të Sekretarit të Përgjithshëm të OKB-së, Antonio Guterres, për punën e misionit të OKB-së në Kosovë (UNMIK).

Vuçiç pretendoi se ndaj serbëve të Kosovës vazhdojnë “sulmet sistematike” nga autoritetet kosovare, por pa ofruar asnjë provë. Ai theksoi se veprimet e fundit të autoriteteve në Kosovën krijuan “kushte të padurueshme” për komunitetin serb që përbën shumicën e popullsisë në pjesën veriore të territorit kosovar, derisa përmendi ndalimin e përdorimit të dinarit serb.

Përgjatë adresimit para anëtarëve të Këshillit të Sigurimit të OKB-së, presidenti serb përmendi edhe “premtimet e pambajtura” rreth themelimit të Asociacionit të Komunave me Shumicë Serbe në Kosovë, por edhe sulmin terrorist të paramilitarëve serbë në Banjë të Zveçanit në veri të Kosovës, duke kërkuar që kjo ngjarje të mos bëhet pretekst për “persekutimin” e serbëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.