Kompania kineze e makinave elektrike po rrëzon nga froni Tesla-n, rekord shitjesh

Kompania kineze BYD ka lëvizur një hap më afër për të rrëzuar Tesla-n e Elon Musk si prodhuesi më i shitur në botë i automjeteve elektrike.

Firma ka njoftuar se ka shitur një rekord prej 526 mijë automjetesh vetëm me bateri në tre muajt e fundit të vitit 2023.

Kjo u ndihmua nga një rritje prej më shumë se 70% në shitje në dhjetor.

Kurse Tesla me bazë në SHBA është planifikuar të publikojë së shpejti shifrat e saj të fundit tremujore të prodhimit dhe shpërndarjes së automjeteve.

Për vitin në tërësi, BYD me bazë në Shenzen ka bërë me dije  se ka shitur më shumë se 3 milionë automjete të ashtuquajtura të energjisë së re (NEV), të cilat përfshijnë automjete vetëm me bateri dhe hibride.

Pothuajse 1.6 milionë nga shitjet totale të saj ishin automjete vetëm me bateri.

Analistët e industrisë kanë parashikuar se Tesla ka shitur rreth 483 mijë automjete elektrike në tre muajt e fundit të vitit 2023 dhe 1.82 milionë për vitin në tërësi.

Janarin e kaluar, Musk ka thënë se Tesla kishte potencialin për të arritur 2 milionë dërgesa në vitin 2023, por që atëherë ka paralajmëruar se kostot më të larta të huamarrjes po ushtronin presion mbi kërkesën për makinat e kompanisë së tij.

Shefi ekzekutiv i BYD, Wang Chuanfu, bashkëthemeloi BYD me kushëririn e tij në Shenzhen në vitin 1995.

Kompania bëri emër si një prodhues i baterive të rikarikueshme – të përdorura në smartphone, laptopë dhe pajisje të tjera elektronike – që konkurronin me importet më të shtrenjta japoneze.

Nisi të shesë aksionet e saj në bursë në vitin 2002 dhe u diversifikua duke blerë një prodhues të makinave në pronësi shtetërore, Qinchuan Automobile Company.

Që nga viti 2008 BYD ka llogaritur si aksioner investitorin veteran amerikan Warren Buffett’s Berkshire Hathaway.

Analistët thonë se BYD i detyrohet rritjes së saj biznesit origjinal – baterive. Ato janë ndër pjesët më të shtrenjta të një makine elektrike dhe duke i bërë ato në shtëpi, BYD kursen shumë para.

Shumë nga konkurrentët e BYD-së mbështeten te prodhuesit e palëve të treta për bateritë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.