Ish-diplomatja amerikane: Serbia është ajo që mund të bëjë më shumë për të destabilizuar rajonin, jo Kosova

Ish-zëvendës shefja e Misionit të Kombeve të Bashkuara në Kosovë (UNMIK), Jennifer Brush, ka thënë se nuk është optimiste se liderët e Kosovës dhe Serbisë duan zgjidhje në dialogun e ndërmjetësuar nga Bashkimi Evropian për normalizimin e marrëdhënieve.

“Nuk e kam aspak të qartë se palët janë të interesuara për një zgjidhje. Të mos harrojmë se (presidenti serb Aleksandër) Vuçiç ka qenë zëdhënës i (Sllobodan) Millosheviç-it. Ai dëshiron që Kosova të mbetet ashtu siç është. Nëse shikoni shtypin në gjuhën serbe, Kosova është pjesë e ‘botës serbe’ (duket se ‘bota serbe’ e ka burimin në ideologjinë nacionaliste serbe, qëllimi i së cilës është krijimi i një shteti serb me përfshirjen e të gjithë serbëve në Ballkan)”, ka thënë Brush.

Në një intervistë për “Radio Evropa e Lirë” në gjuhën serbe, ish-diplomatja amerikane ka theksuar se përderisa Vuçiç “e sheh veten si president i ‘botës serbe’, ai nuk mund të jetë një negociator i ndershëm në asnjë tryezë”.

“Unë e di që Shtetet e Bashkuara dhe Bashkimi Evropian (BE) besojnë se ai është personi që mund të bëjë një marrëveshje, sepse ai ka mbështetjen e popullit dhe kushdo më i dobët se ai nuk do të ishte në gjendje të bënte një marrëveshje. Por unë nuk jam dakord. Po ashtu, shumica e vëzhguesve ndërkombëtarë besojnë se zgjedhjet parlamentare në Serbi nuk ishin të drejta”.

Vuçiç, sipas ish-diplomates amerikane, mendon se është (ish-lideri i ish-Jugosllavisë, Josip Broz) Tito i ri, “me idenë për t’u ulur në tre karrige – neutral, në rrugën drejt BE-së dhe në marrëdhënie të ngushta me Rusinë”.

“Kjo mund të ketë funksionuar në vitet ’40 ose ’50, por nuk mendoj se funksionon si një politikë e qëndrueshme në botën tonë aktuale”.

Nga ana tjetër, Brush ka theksuar se sa i përket Kryeministrit të Kosovës, Albin Kurti, “ai nuk është zgjedhur për të bërë marrëveshje me Serbinë, ai është zgjedhur për të luftuar për Kosovën”.

“Ai ka detyrime ndaj elektoratit të tij dhe së shpejti do të shkojë në një raund të ri zgjedhjesh”, shtoi ajo.

Brush, e cila ka qenë edhe zëvendësshefe e misionit në ambasadën amerikane në Beograd, thotë se Perëndimi duhet të rrisë presionin ndaj Serbisë, sepse sipas saj, Serbia mund të bëjë më shumë për të destabilizuar rajonin dhe jo Kosova.

“Mendoj se duhet t’i kushtohet më shumë vëmendje Beogradit dhe Vuçiç-it, sepse Kurti brenda kufijve të Kosovës mund të bëjë shumë pak për të destabilizuar rajonin, ndërsa Serbia mund të bëjë shumë. Dhe ai duket se po e bën këtë duke inkurajuar (liderin e Republika Srpska) Milorad Dodik (me ide secesioniste) dhe duke ruajtur miqësinë me rusët”, pohon.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.