Përfaqësuesit e Shoqatës “Evropa Nostra” takohen me komandantin e KFOR-it, flasin për ruajtjen e Manastirit të Deçanit

Përfaqësuesit e Shoqatës “Evropa Nostra” janë takuar me komandantin e KFOR-it në Kosovë, Ferenc Kajari dhe kanë biseduar për ruajtën e Manastirit të Deçanit.

Kjo shoqatë ka njoftuar përmes një postimi në Twitter se Manastiri i Deçanit është përfshirë në listën e tyre të shtatë monumenteve kulturore dhe historike më të rrezikuara në Evropë.

“Falënderimi më i madh për komandantin e KFOR-it, gjeneralmajor Ferenc Kajari, për pritjen e delegacionit tonë në mënyrë që të kemi një shkëmbim të frytshëm të mendimeve për nevojën e ruajtjes së nivelit të lartë të mbrojtjes së Manastirit të Deçanit, i cili është në Listën e Trashëgimisë Botërore në Rrezik, i cili është përfshirë edhe në listën tonë të shtatë monumenteve kulturore dhe historike më të rrezikuara në Evropë për vitin 2021”, kanë shkruar kjo shoqatë.

Most grateful to @NATO_KFOR Commander, Major General #FerencKajári, for receiving our delegation for a fruitful exchange of views on the need to maintain the high protection of #DečaniMonastery, World Heritage Site in Danger, also inscribed on our 2021 List of #7MostEndangered. pic.twitter.com/AKwcNDO0tJ

— Europa Nostra (@europanostra) July 5, 2022

Në muajin prill të vitit 2021, Presidentja e Kosovës, Vjosa Osmani-Sadriu dhe kryeministri Albin Kurti i kishin dërguar “Europa Nostra-s” një letër në të cilën jepen një varg argumentesh sipas të cilave Manastiri i Deçanit nuk përmbush kriteret për të hyrë në programin e “Shtatë momunemteve të rrezikuara”.

Në këtë letër thuhej se “në sulmet e pretenduara ndaj manastirit, gjuha e përdorur nga nominuesi është e pasaktë, duke qenë siç thuhet, edhe tendencioze dhe e papranueshme”, thuhet në letrën e Osmanit dhe Kurtit.

“Termi ‘ekstremistët lokalë’ është cilësim i ekzagjeruar qëllimshëm, ndërsa sulmi i pretenduar nga organizata terroriste ISIS është totalisht i pabazuar në fakte”.

“Kjo gjuhë na bën të besojmë se teksti i nominimit nuk ka ndjekur linjë profesionale të argumentimit, dhe ka devijuar në përmbajtje me ngarkesa politike dhe propaganduese. Dëshmia më e mirë është mungesa e burimeve të besueshme mbi të cilat bazohen këto konstatime tendencioze”, thuhet në letër.

Megjithatë, “Europa Nostra” e ka futur Manastirin e Deçanit në mesin e shtatëve monumenteve më të rrezikuara të trashëgimisë.

Në vitin 2008, Kuvendi i Kosovës miratoi Ligjin për zona të veçanta të Mbrojtura, i cili duhet të sigurojë mbrojtjen e manastireve ortodokse serbe, kishave, vendeve të tjera fetare, si dhe vendeve historike dhe kulturore të një rëndësie të veçantë për komunitetin serb si dhe për komunitetet tjera në Republikën e Kosovës. Manastiri i Deçanit është njëra nga zonat e mbrojtura, sipas këtij ligji.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.