Për Kryetarin e Aleancës për Ardhmërinë e Kosovës (AAK), vizita e Shefit të Agjencisë Qendrore Amerikane të Inteligjencës (CIA), William Burns, në Kosovë, është “nder i madh për vendin dhe lajm i mirë për sigurinë tonë”.
“Për ne, është jetike integrimi në familjen euroatlantike, dhe aleanca me Amerikën është e përjetshme”, shkroi Haradinaj në Facebook.
Institucionet e Kosovës, bëri thirrje ish-kryeministri, duhet të qëndrojnë të palëkundura për aleancën me Amerikën.
“Takimet e drejtorit Burns me udhëheqësit e institucioneve, janë lajm i mirë për Kosovën”.
Ndërsa, sa i përket Kurtit dhe agjendës së tij, Haradinaj tha se “ia lëmë kohës ta dëshmojë, por askush nuk mund ta rrezikojë aleancën e Kosovës me Amerikën”.
“Ajo është e përjetshme dhe jetike”, përfundoi ai.
Shefi i CIA-s ka qëndruar të enjten dhe të premten në Kosovë.
Fillimisht ka takuar Presidenten Vjosa Osmani, së bashku me Shefin e Agjencisë Kosovare të Inteligjencës (AKI), Petrit Ajeti.
Ndërsa, të premten është takuar me kryeministrin Albin Kurti.
Vizita në Kosovë e Shefit të CIA-s vjen në kuadër të “turneut ballkanik” të kësaj jave, ndonëse nuk janë dhënë fare detaje specifike rreth arsyes së vizitës.
Fillimisht, Burns vizitoi Bosnje e Hercegovinën më 20 gusht, ndërsa më 21 gusht, qëndroi në Serbi.
Për këto vizita nuk janë dhënë fare informacione zyrtare.
Osmani pas takimit me Shefin e CIA-s: Aleanca me SHBA-të, garancë për siguri, paqe dhe sukses
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
