Gati 2% e burrave dhe djemve shqiptarë kanë udhëtuar drejt MB-së me gomone

Gati dy për qind e burrave dhe djemve shqiptarë ka kaluar në Mbretërinë e Bashkuar me gomone të vogla.

Kështu ka bërë me dije komandanti i Kërcënimit të Kanalit Klandestin të qeverisë britanike, Dan O’Mahoney.

Ai e ka zbuluar shifrën tronditëse para deputetëve në komisionin e Punëve të Brendshme, duke thënë se 12 mijë shtetas shqiptarë kishin kaluar Kanalin me gomone të vogla vetëm gjatë këtij viti.

Mbi 38 mijë njerëz kanë mbërritur në MB pasi kanë kaluar Kanalin me mbi 900 gomone në vitin 2022 deri më sot, krahasuar me 28 mijë e 526 vitin e kaluar.

Ish-sekretarja e Brendshme Priti Patel ka pohuar në fillim të këtij viti se rreth 60 për qind e njerëzve që kishin mbërritur në MB me gomone të vogla këtë verë ishin shqiptarë.

Po ashtu deputetët dëgjuan se 93 për qind e 38 mijë mbërritjeve përmes gomoneve të vogla në vitin 2022 kanë aplikuar për azil në MB, nga shifrat totale prej 98 për qind vitin e kaluar.

Aktualisht, ka vonesa të konsiderueshme në përpunimin e aplikimeve, me Zyrën e Punëve të Brendshme që ka përpunuar vetëm katër për qind të aplikimeve për azil nga njerëzit që kanë kaluar kufirin në vitin 2021.

Sakaq, pjesën së mbetur prej 85 për qind i është dhënë statusi i refugjatit ose një status tjetër mbrojtjeje.

Drejtor i azilit, mbrojtjes dhe zbatimit, Dan Hobbs, ka treguar se aktualisht ekziston një “sfidë në përpunimin e kërkesave për azil në kohën e duhur”.

Por vonesa ka pasur një efekt të dëmshëm për sa i përket kostos për taksapaguesit, me 5.6 milionë paund që shpenzohen çdo ditë për strehimin e azilkërkuesve në hotele.

Dhe për më tepër, kjo shifër nuk përfshin koston e strehimit të afganëve të zhvendosur në hotele, e cila kushton 1.2 milionë paund shtesë në ditë.

Shifra totale prej 6.8 milionë paund në ditë për strehimin e azilkërkuesve në hotele – mbi dy milionë paund më shumë sesa qeveria ka thënë se po shpenzonte në shkurt – mund të vazhdojë të rritet.

Nga ana tjetër, zyrtarët kanë zbuluar se shkalla e përgjimit të bërë nga policia franceze e emigrantëve që tentonin të udhëtonin nëpër Kanal ka rënë.

Sipas O’Mahoney, shkalla e përgjimit për policinë franceze që ndalonte migrantët që përpiqeshin të kalonin Kanalin vitin e kaluar ishte 50 për qind dhe këtë vit ajo ka rënë në 42.5 për qind.

Ai ka pranuar gjithashtu se kjo është një përqindje më e ulët, por “një numër shumë, shumë më i madh”, duke treguar se si autoritetet franceze kishin ndaluar 28 mijë emigrantë që kalonin Kanalin dhe se kishin kapur 1 mijë e 72 gomone këtë vit.

“Është e saktë të thuhet se emigrantët mund të tentojnë të kalojnë në më shumë se një rast dhe për këtë arsye ata 28 mijë emigrantë mund të mos jenë emigrantë të ndryshëm, kështu që janë 28 mijë përpjekje”, ka shtuar ai.

Në Francë, emigrantët nuk ndalohen pasi janë kapur në përpjekje për të kaluar Kanalin.

O’Mahoney ka ravijëzuar se ligjet franceze e bëjnë “të vështirë për oficerët francezë që të ndërmarrin ndonjë veprim në atë mënyrë”.

Shqetësimet janë ngritur edhe në lidhje me kushtet në vendndodhjen e aeroportit Manston në Kent, i cili synohet të jetë një strukturë mbajtjeje afatshkurtër për emigrantët kur ata të mbërrijnë në MB.

Deputetët dëgjuan gjithashtu se numri i njerëzve që mbërrinin po “tejkalonte” kapacitetin e zonës dhe disa po mbaheshin atje për një muaj, krahasuar me 24 orët e parashikuara.

Dhe se kostoja totale e sistemit të azilit në MB ka kaluar dy miliardë paund në vit, me numrin më të lartë të kërkesave për dy dekada dhe vonesa rekord për njerëzit që presin një vendim.

Nga Zyra e Punëve të Brendshme, shpenzimet për azil u rritën me 756 milionë paund, nga rreth 1.4 miliardë paund në vitet 2020 dhe 2021 në 2.1 miliardë paund në vitet 2021 dhe 2022.

Kjo shifër është rekord dhe përbën më shumë se dyfishin e shumës së shpenzuar në vitet 2019 dhe 2020.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.