Festivali muzikor “Underneath the Stars” përfundon rrugëtimin pas 10 vjetësh

Festivali i muzikës dhe artit i cili filloi 10 vjet më parë do të mbahet për herë të fundit këtë verë.

“Underneath the Stars” është mbajtur në një fermë në fshatin Cawthorne, afër Barnsleys në Angli, që nga viti 2014.

Festivali i fundit do të zhvillohet nga 2 deri në 4 gusht përpara se organizatorët të tërhiqen për shkak të ndryshimeve në rrethanat e tyre personale dhe profesionale.

Këngëtarja e shquar Kate Rusby, komediani Bill Bailey dhe grupi “The Feeling” do të performojnë këtë edicion lamtumirës.
Në një deklaratë në uebsajtin e festivalit, organizatorët thanë: “Me zemër të lënduar ju njoftojmë se festivali i këtij viti do të jetë i fundit për momentin dhe se kemi vendosur të bëjmë një pushim në rrugëtimin tonë të festivalit”.

“Megjithatë, mos u shqetësoni, gjithçka është në rrugën e duhur për të siguruar që viti 2024 do të jetë më i miri deri më tani dhe një festë e përshtatshme e 10 viteve yjore”, shtuan ata.

“Underneath the Stars” u zhvillua për të mbështetur dhe ofruar një platformë si për artistët në zhvillim ashtu edhe për artistët e njohur.

“Duke parë prapa, ne jemi të përmbushur nga krenaria dhe gëzimi”, shtohet në deklaratë.

“Që nga fillimet tona modeste deri tek mirëpritja e një publiku të bukur, gjithnjë në rritje, çdo moment ka qenë një ëndërr e realizuar. Tani, ne e gjejmë veten në vende të ndryshme, si personalisht ashtu edhe profesionalisht dhe duke vepruar në kohë të ndryshme”, u tha tutje.

Ndërsa një rikthim në skenën e festivalit nuk është përjashtuar plotësisht, organizatorët thanë se peizazhi i industrisë ishte “sfidues” dhe u kërkuan njerëzve të mbështesin ngjarje të pavarura që kontribuojnë në zhvillimin e kulturës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.